សារព័ត៌មាន នគរវត្ត តែងតែនាំមុខគេជានិច្ច
ខេត្តសៀមរាប៖ ទន្ទឹមនឹងទំនិញចេះតែឡើងថ្លៃ ចំណែកប្រជាកសិករជួបនឹងវិបត្តិសេដ្ឋកិច្ចរកលុយពុំសូវបានផងនោះ ត្រូវបានអាជីវករត្អូញត្អែរថា ស្ងាត់ឈឹងលក់មិនសូវដាច់ បែរជាប្រធានផ្សារទារភាស៊ីថ្លៃជាងផ្សារនានាក្នុងខេត្តសៀមរាប។
អាជីវករម្នាក់ក្នុងចំនោមអាជីវករជាច្រើនបានត្អូញត្អែរសឹងដូចៗគ្នាថា ខ្ញុំគ្មានជំរើសទេបើមិនជួលតូបឬមិនលក់ដូរក៏មានអ្នកផ្សេងគេចាំជួលតូបប្រណាំងប្រជែងគ្នាដែរ ដូច្នេះហើយចេះតែទ្រាំៗទៅ ធ្វើម្ដេចបើគ្មានកន្លែងលក់ដូរផងនោះ ។
អាជីវករម្នាក់ទៀតបានប្រាប់ថា ខ្ញុំរាល់ថ្ងៃរកសំរាប់តែបង់ភាស៊ីនិងឲ្យថ្លៃតូបសឹងមិនគ្រប់ដល់លក់យូរៗទៅ ស្ទើរតែ អស់ដើមអស់ចុងទៅហើយ ក្នុងមួយថ្ងៃខ្ញុំបង់ភាស៊ី ២ពាន់រៀល និងថ្លៃជួលតូប ក្នុង១ខែ ១២០ដុល្លាថែមទៀត ដូច្នេះ ខ្ញុំខំប្រឹងយ៉ាងណាក៏រកលុយមិនសល់ដែរ ។
ក្នុងនោះមហាជនបានសង្កេតឃើញថាដោយសារតែ អាជីវករគ្មានជំរើសនេះហើយ ធ្វើឲ្យ ប្រធានផ្សារ សប្បាយចិត្តក្នុងការដើរប្រមូលភាស៊ីតាមទំនើងចិត្ត មិនគោរពចរាចរណ៍ ដែលរាជរដ្ឋាភិបាលបានដាក់ចេញសេចក្ដីប្រកាសថា ហាមមិនឲ្យយកភាស៊ីតាមកញ្ច្រែង តែវាផ្ទុយស្រលះទៅនិងសេចក្ដីប្រកាសដែលបានហាមឃាត ហើយបែរជាថ្កើនទៅនិងច្បាប់របស់ រាជរដ្ឋាភិបាលទៅវិញ។
អាជីវករជាច្រើន បានសំណូមពរឲ្យលោក ស៊ុន នីប្រធានផ្សារក្រោម បញ្ចុះ តំលៃ ភាស៊ី ឲ្យដូចផ្សារដ៏ទៃនិងត្រូវទទួលសំណូមពររបស់អាជីវករផង ព្រោះផ្សារនេះពេលភ្លៀងមកលិចស្ទើរគ្រប់ទាំងអស់ អាជីវករមិនចង់បានអ្វីលើសនិងទេ ដូច្នេះ សុំឲ្យ លោកអភិបាលក្រុង និង លោកអភិបាលខេត្តសៀមរាប មេត្ដាពិនិត្យមើល សុខទុក្ខរបស់ប្រជាពលរដ្ន និងអាជីវករ ផ្សារក្រោមផង។
លោក ស៊ុន នី ប្រធានផ្សារក្រោមបានប្រាប់ក្នុងកិច្ចសម្ភាសថា មូលហេតុដែលភាស៊ីថ្លៃបែបនេះបណ្ដាលមកពី ផ្សារនេះជាផ្សារឯកជន ជួលដីគេធ្វើផ្សារ ក្នុង១ខែ ២៤លានរៀល ឯការយក ភាស៊ី២ពាន់រៀលនេះ គឺសំរាប់បង់ឲ្យម្ចាស់ដីផង និងបង់ចូលរដ្នផង បានជាមានតំលៃថ្លៃជាងផ្សារផ្សេងៗក្នុងខេត្តសៀមរាប ៕ ប៊ុនរិទ្ធី
