ប្រុសស្រី២នាក់រងរបួសធ្ងន់ដោយសារម៉ូតូបុកគ្នានៅស្រុកស្វាយជ្រំ

ខេត្តស្វាយរៀង៖ ប្រុសស្រី២នាក់បានរងរបួសធ្ងន់ ដោយយសារករណិគ្រោះថ្នាក់ចរាចរណ៍រវាងម៉ូតូបុកគ្នាកាលពីវេលាម៉ោង៦និង៣០នាទីល្ងាច ថ្ងៃពុធ ៣កើត ខែបុស្ស ឆ្នាំរកា នព្វស័ក ព.ស. ២៥៦១ ត្រូវនឹងថ្ងៃទី២០ ខែធ្នូ ឆ្នាំ២០១៧ នៅចំណុចផ្លូវលំដីក្រាលគ្រួសក្រហម ភូមិតាប៉ ឃុំតាសួស ស្រុកស្វាយជ្រំ ។

បើតាមសមត្ថកិច្ចនគរបាលស្រុកបានឲ្យនគរវត្តដឹងថា ប្រុសស្រីទាំង២នាក់ ដែលរងរបួសធ្ងន់មានឈ្មោះ មាស ហឿន អាយុ៤៧ឆ្នាំ នៅភូមិចំបក់ សង្កាត់ចេក ក្រុងស្វាយរៀង ខណៈជិះ ម៉ូតូម៉ាកវីវ៉ា សេរី២០១៣ ពណ៌ក្រហមពាក់ស្លាកលេខ ស្វាយរៀង 1F០៣០៣ ខូចខាតយ៉ាងដំណំ។ ចំណែកភាគីម្ខាងទៀត មានឈ្មោះ សូ សុភ័ក្រ ភេទស្រី អាយុ១៧ឆ្នាំ មុខរបរមិនពិតប្រាកដ មិនត្រូវបានស្គាល់ទីលំនៅឡើយ។

បើតាមសាក្សីបានឲ្យដឹងថា មុនកើតហេតុមានម៉ូតូ ម៉ាកវីវ៉ា សេរី២០១៣ពណ៌ ក្រហម ពាក់ស្លាកលេខ ស្វាយរៀង 1F០៣០៣ បើកដោយបុរសម្នាក់ដោយធ្វើដំណើរពីត្បូងទៅជើង ខណៈនោះស្រាប់តែទៅបុកនឹងម៉ូតូម៉ាកC125 ពណ៌ខ្មៅសេរី ២០១០ ស្លាកលេខ ព្រៃវែង1C9000 បើកដោយស្ត្រីម្នាក់ដែលធ្វើដំណើរពីជើងទៅត្បូងយ៉ាងពេញទំហឹងលាន់សូរដូចរន្ទះបាញ់ បណ្ដាលឲ្យដួលរណូករណែកពេញផ្លូវ។

ក្រោយមក អ្នកភូមិបានរាយការណ៍មកសមត្ថកិច្ចនគរបាលមកអន្តរាគមន៍យកភាគីទាំងសងខាង មកកាន់មន្ទីរពេទ្យ និងវាស់វែង និងអូសវត្ថុតាងមកកាន់អធិការដ្ឋាននគរបាលស្រុកស្វាយជ្រំដើម្បីចាត់ការតាមច្បាប់៕ យឹម សុថាន