សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ជនសង្ស័យចំនួន៤នាក់ ជាមុខសញ្ញាជួញដូរ និងចែកចាយថ្នាំញៀនត្រូវបាននគរបាលខណ្ឌមានជ័យ សហការជាមួយនគរបាលប៉ុស្តិ៍សង្កាត់ចាក់អង្រែក្រោម ធ្វើការឃាត់ខ្លួនដកហូតគ្រឿងញៀនចំនួន០២កញ្ចប់ធំរួមនិងឧបករណ៍ជក់មួយចំនួនទៀត។
ប្រតិបត្តិការនេះ បានធ្វើឡើងនៅវេលាម៉ោង១៦និង៣០នាទី ថ្ងៃព្រហស្បតិ៍ ៤កើត ខែបុស្ស ឆ្នាំរកា នព្វស័ក ព.ស. ២៥៦១ ត្រូវនឹងថ្ងៃទី២១ ខែធ្នូ ឆ្នាំ២០១៧ នៅចំណុចផ្ទះល្វែង ក្រោយតារាងបាល់ទាត់ ភូមិទួលរកា៣ សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ
ជនសង្ស័យទី១ ឈ្មោះ សាន ភក្ដី ភេទប្រុស អាយុ៣៥ឆ្នាំ មានទីលំនៅបច្ចុប្បន្ន ភូមិព្រែកតាឡុង សង្កាត់ចាក់អង្រែក្រោម ខណ្ឌមានជ័យ ភ្នំពេញ។ (មុខសញ្ញាជួញដូរគ្រឿងញៀន)។
ទី២ ឈ្មោះ ងួន ស៊ីណាត ភេទប្រុស អាយុ៣២ឆ្នាំ ភូមិព្រៃស្ពឺ ឃុំព្រៃស្ពឺ ស្រុកកោះធំ ខេត្តកណ្ដាល (ជួញដូរ) ។
ទី៣ ឈ្មោះ អៀវ សុផាណូ ភេទប្រុស អាយុ៣១ឆ្នាំ មានទីលំនៅបច្ចុប្បន្នផ្ទះលេខ៥៦ ផ្លូវលំ ក្រុម២៣ ភូមិទួលរកា៣ សង្កាត់ចាក់អង្រែក្រោម ខណ្ឌមានជ័យ ភ្នំពេញ (ប្រើប្រាស់)។
ទី៤ ឈ្មោះ អៀវ សុផានិត ភេទប្រុស អាយុ៣៤ឆ្នាំ ភូមិទួលក្រសាំង ក្រុងតាខ្មៅ ខេត្តកណ្ដាល (ប្រើប្រាស់) ។
តាមចម្លើយសារភាពរបស់ជនសង្ស័យទី២ ឈ្មោះ ងួន ស៊ីណាត បានសារភាពថាខ្លួនពិតជាបានទិញថ្នាំញៀនពីឈ្មោះ សាន ភក្ដី ពិតប្រាកដមែន ទើបភ្លាមៗនោះលោកក៏បញ្ជាឲ្យកម្លាំងនគរបាលក៏ឃាត់ខ្លួនជនសង្ស័យ ២នាក់បងប្អូន អៀវ សុផាណូ, អៀវ សុផានិត និងឈ្មោះងួន ស៊ីណាត ដើម្បីបញ្ជូនមកសាកសួរនៅឯប៉ុស្តិ៍រដ្ឋបាលសង្កាត់ចាក់អង្រែក្រោមទាំងតែម្ដង និងអោយកម្លាំងប៉ុស្តិ៍ចុះស្រាវជ្រាវបន្តទៅឆែកផ្ទះរបស់ឈ្មោះ សាន ភក្ដី តែមិនបានរកឃើញអ្វីទេ។
បច្ចុប្បន្នជនសង្ស័យទាំង៤នាក់ រួមនឹងវត្ថុតាំងគ្រឿងញៀន ២កញ្ចប់នោះ ត្រូវបាននគរបាលប៉ុស្តិ៍ឃុំខ្លួនរងចាំបន្តនីតិវិធីជាបន្ត ៕ សុខាសែនជ័យ
