សារព័ត៌មាន នគរវត្ត តែងតែនាំមុខគេជានិច្ច
ខេត្តតាកែវ៖ ក្រុមមន្ត្រីជលផលចតុមុខបានចុះទៅពិនិត្យមើលស្ថានភាពបទល្មើសនេសាទនៅស្រុកអង្គរបុរី ខេត្តតាកែវ ។ ពេលទៅដល់គេបានឃើញ បទល្មើសនេសាទជាច្រើនដូចជា របាំងព្រួល និងសៃយ៉ឺនជាដើម ។ នៅព្រឹកថ្ងៃព្រហស្បតិ៍ ១១ កើត ខែបុស្ស ឆ្នាំរកា នព្វស័ក ព.ស២៥៦១ ត្រូវនឹងថ្ងៃទី២៨ ខែធ្នូ ឆ្នាំ២០១៧ ក្រុមមន្ត្រីជលផលចតុមុខ បានទៅដល់ភូមិព្រែកជន្លា ឃុំបាស្រែ ស្រុកអង្គរបុរី ខេត្តតាកែវបានប្រទះឃើញសៃយ៉ឺនរបស់ជនជាតិវៀតណាម ដែលកំពុងដាក់ប្រមូលផលនេសាទ នៅព្រែកជន្លានេះ។ ពេលនោះ លោកអ៊ឹម ផាត បានចេញមុខមកសម្របសម្រួល ខ្សឹបខ្សៀវទារលុយពីជនជាតិវៀតណាមនោះ១០០ដុល្លារ ឲ្យទៅមន្ត្រីជលផលចតុមុខត្រឡប់មកផ្ទះវិញ និងប្រាប់ថា ចាំនិយាយគ្នាទៀត។
លោក អ៊ឹម ផាត ជាអ្នកសហការជាមួយបុរសជនជាតិវៀតណាមឈ្មោះ ង្វៀង ចាន់ត្រាយ ក្នុងការនាំជនជាតិវៀតណាមមកនេសាទក្នុងស្រុកអង្គរបុរី ខេត្តតាកែវ ។ ទូកនេសាទត្រូវបង់ប្រាក់២០ម៉ឺនដុល្លារសម្រាប់ការចេញ ចូល១ថ្ងៃ ។ ក្រៅពីនោះ មានការដាក់របាំងព្រួល គិតតម្លៃលុយតាមចម្ងាយ ក៏ដូចជាការដាក់សៃយ៉ឺនជាដើម គឺសុទ្ធតែបង់ប្រាក់ឲ្យលោកអ៊ឹម ផាតទាំងអស់ ។
លោកអ៊ឹម ផាត បានប្រាប់អ្នកកាសែតថា បញ្ហាបទល្មើសនៅស្រុកអង្គរបុរីមិនមែនជាការទទួលខុសត្រូវរបស់លោកទេ ប៉ុន្តែវាជាកិច្ចការរបស់សហគមន៍។
ប៉ុន្តែសម្រាប់ប្រជាពលរដ្ឋខ្មែរនៅស្រុកអង្គរបុរី គ្រាន់តែនេសាទដើម្បីចិញ្ចឹមក្រពះត្រូវលោកអ៊ឹម ផាតដេញបាញ់បែកទូកខ្ទេច និងចាប់មនុស្សបញ្ជូនឲ្យតុលាការដាក់ទោសទៀតផង។ នៅពេលដែលមានបទល្មើស លោកអ៊ឹម ផាតទម្លាក់កំហុសទៅលើសហគមន៍នៅទីនោះទៅវិញ ។
អាជ្ញាធរខេត្តតាកែវធ្វើមិនដឹងមិនឮចំពោះបញ្ហាដែលកំពុងកើតមាននៅឯស្រុកអង្គរបុរីនោះ ។ លោកឡាយ វណ្ណៈ បានអះអាងថា សហគមន៍ត្រូវការលុយ ដូច្នេះអនុញ្ញាតឲ្យជនជាតិវៀតណាមចូលនេសាទបន្តិចបន្តួច។
សម្រាប់ប្រជាពលរដ្ឋខ្មែរកំពុងក្តៅក្រហាយជាខ្លាំងចំពោះទង្វើរបស់អាជ្ញាធរ និងមន្ត្រីមានសមត្ថកិច្ចនៅខេត្តតាកែវនេះ ។ គេមិនដឹងថា តើអភិបាលខេត្តតាកែវយល់ថា វាជាអំពើចំណេញឬយ៉ាងណានោះទេ ចំពោះបញ្ហាបទល្មើសនេសាទនៅស្រុកអង្គរបុរីនេះ ៕ ហេង សូរិយា
លោកអ៊ឹម ផាត
