សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ យុវជនម្នាក់ ត្រូវមិត្តភ័ក្តិធ្វើការជាមួយគ្នាចាប់យកប្រគល់ឲ្យសមត្ថកិច្ចចាត់ការតាមច្បាប់ ក្រោយធ្វើសកម្មភាពខ្ចីម៉ូតូមិត្តភ័ក្តិ២គ្រឿងលួចយកទៅស៊ីុគ្រឿងអស់ ។
ករណីឃាត់ខ្លួនយុវជនសង្ស័យខាងលើនេះ បានធ្វើឡើងកាលពីវេលាម៉ោង៨និង៣០នាទីយប់ថ្ងៃសុក្រ ខែបុស្ស ឆ្នាំរកា ព.ស២៥៦១ ត្រូវនឹងថ្ងៃ២៩ ខែធ្នូ ឆ្នាំ២០១៧ នៅចំណុចកោះពេជ្យ ស្ថិតក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ។
ជនសង្ស័យម្នាក់ឈ្មោះទូចសុខ ឃាង អាយុ១៨ឆ្នាំ ស្នាក់នៅសង្កាត់ទំនប់ទឹក ខណ្ឌចំការមន រាជធានីភ្នំពេញ ។
តាមប្រភពពីសមត្ថកិច្ចនគរបាលប៉ុស្តិ៍ទំនប់ទឹក ខណ្ឌចំការមន បានឲ្យដឹងថា ជនសង្ស័យខាងលើនេះទើបតែចូលធ្វើការមិនទាន់បានមួយខែផង បានយកម៉ូតូមិត្តភ័ក្តិ២គ្រឿង មួយគ្រឿងម៉ាក scoopy ពាក់ស្លាកលេខភ្នំពេញ 1CU-8565 និងមួយគ្រឿងទៀតម៉ាក zoomer x គ្មានស្លាកលេខ ហើយត្រូវជនរងគ្រោះឃើញចាប់ឃាត់ខ្លួនបាននៅកោះពេជ្រ នាំយកមកប្រគល់ឲ្យនគរបាលទំនប់ទឹកវិញ ព្រោះជាទីតាំងកើតហេតុដែលជនរងគ្រោះដាក់ពាក្យបណ្តឹង ។
បច្ចុប្បន្នជនសង្ស័យកំពុងឃាត់ខ្លួនបណ្ដោះអាសន្ននៅអធិការដ្ឋាននគរបាលខណ្ឌចំការមន ដើម្បីបញ្ចូនទៅតុលាការចាត់ការតាមច្បាប់ ៕ស រស្មី
