សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ កម្លាំងនគរបាលខណ្ឌពោធិ៍សែនជ័យ ដឹកនាំដោយលោកវីរសេនីយ៍ឯកយឹម សារ៉ាន់អធិការនគរបាលខណ្ឌ បានឆ្មក់បង្ក្រាបក្រុមអ្នកប្រើប្រាស់គ្រឿងញៀនចំនួន១៥នាក់ដកហូតថ្នាំញៀនមួយចំនួនរួមទាំងកាំភ្លើងខ្លីមួយដើម។
ហេតុការណ៍នេះបានកើតឡើងកាលពីវេលាម៉ោង១០និង៣០នាទីព្រឹក ថ្ងៃសុក្រ ៤រោច ខែបុស្ស ឆ្នាំរកា នព្វស័ក ព.ស. ២៥៦១ ត្រូវនឹងថ្ងៃទី៥ ខែមករា ឆ្នាំ២០១៨ នៅផ្ទះសំណាក់ពេជ្រមរកត់ តាមបណ្តោយផ្លូវលេខ២០១១ ភូមិតាងួន២ សង្កាត់កាកាប១ ខណ្ឌពោធិ៍សែនជ័យ រាជធានីភ្នំពេញ។
លោកវីរសេនីយ៍ យឹម សារ៉ាន់ អធិការនគរបាលខណ្ឌបានអោយដឹងថា នៅមុនពេលកើតហេតុកម្លាំងនគរបាលអន្តរាគមន៍ពិសេសបានចុះបង្ក្រាបជនសង្ស័យចំនួន២នាក់នៅផ្លូវរថភ្លើងសង្កាត់កាកាប១ ខណ្ឌពោធិ៍សែនជ័យ បន្ទាប់ពីសួនាំរួចក៏បន្តមកបង្ក្រាបជនសង្ស័យជាបក្ខពួកនៅក្នុងបន្ទប់ផ្ទះសំណាក់យីហោពេជ្រមរកត់ និងឃាត់ខ្លួនជនសង្ស័យចំនួន១៣នាក់ ថែមទៀតក្នុងនោះ មាននារី៦នាក់ផងដែរ។
លោកអធិការបានបន្ដថា ក្នុងប្រតិបត្តិកានេះកម្លាំងដកហូតថ្នាំញៀនចំនួន១កញ្ចប់ រួមទាំងកាំភ្លើងខ្លីម៉ាក K54 មួយដើម និងម៉ូតូ៨គ្រឿង។
លោកអធិការបានបន្តទៀតថា ជនសង្ស័យជាមេក្លោងឈ្មោះ ហុង ណាំហោ អាយុ៣៨ឆ្នាំស្នាក់នៅភូមិចំកាឪឡឹក សង្កាត់កាកាប១ ខណ្ឌពោធិ៍សែនជ័យ មានស្រុកកំណើតនៅភូមិឃ្លៃចាស់ ឃុំពោធិ៍ចំរើន ស្រុកបសេដ្ឋ ខេត្តកំពង់ស្ពឺ។
ចំណែកម្ចាស់កាំភ្លើងឈ្មោះ សុថុនអាយុ៣២ឆ្នាំ ស្រុកកំណើតនៅភូមិឃ្លៃចាស់ ឃុំពោធិ៍ចំរើន ស្រុកបសេដ្ឋ ខេត្តកំពង់ស្ពឺ។
ក្រោយពីបង្ក្រាបជនសង្ស័យត្រូវបានបញ្ជូនទៅអធិការនគរបាលខណ្ឌពោធិ៍សែនជ័យដើម្បីសាកសួរ និងបញ្ជូនទៅតុលាការចាត់កាតាមនីតិវិធី ៕ សុខាសែនជ័យ
