សារព័ត៌មាន នគរវត្ត តែងតែនាំមុខគេជានិច្ច
ខេត្តព្រះសីហនុ៖ បុរសម្នាក់ត្រូវរថយន្តបុកស្លាប់ ក្នុងខណៈជនរងគ្រោះបានបើកម៉ូតូអូសរទេះដឹកទឹក បត់ឆ្លងផ្លូវពីស្តាំទៅឆ្វេង។
ហេតុការណ៍នេះបានកើតឡើងនៅល្ងាច ថ្ងៃសៅរ៍ ១២រោច ខែបុស្ស ឆ្នាំរកា នព្វស័ក ព.ស. ២៥៦១ ត្រូវនឹងថ្ងៃទី១៣ ខែមករា ឆ្នាំ២០១៨ វេលាម៉ោង ៥:00នាទី លើផ្លូវជាតិលេខ៤ ចន្លោះគីឡូម៉ែត្រ ១៨៩-១៨០ ស្ថិតនៅក្នុងភូមិវាលមាស ឃុំវាលរេញ ស្រុកព្រៃនប់ ខេត្តព្រះសីហនុ។
គ្រោះថ្នាក់ចរាចរណ៍នេះបានកើតឡើង រវាង រថយន្ត១គ្រឿងម៉ាក SSANGYONG ពណ៌ ស្លែ គ្មានស្លាកលេខ បើកបរដោយឈ្មោះ ផាន់ ណាហ្វី ភេទ ប្រុស អាយុ១៩ឆ្នាំ មុខរបរអ្នកបើកបររថយន្ត មានទីលំនៅភូមិចុងខ្សាច់ ឃុំទួលទទឹង ស្រុកព្រៃនប់ ខេត្តព្រះសីហនុ មានទិសដៅពីភ្នំពេញ ឆ្ពោះមក ខេត្តព្រះសីហនុ ដល់ចំណុចខាងលើ បានបុកម៉ូតូ ០១គ្រឿងដែលបត់ឆ្លងកាត់ផ្លូវ ពីស្តាំទៅឆ្វេង ម៉ាក HONDA C125 ពណ៌ ខ្មៅ ពាក់ស្លាកលេខ ភ្នំពេញ 1G-8833 អូសរទេះ បើកបរដោយឈ្មោះ ព្រំ ណាត ភេទ ប្រុស អាយុ ៤៥ឆ្នាំ មានទីលំនៅភូមិឃុំកើតហេតុ បណ្តាលឲ្យស្លាប់នៅនឹងកន្លែងកើតហេតុ។
អ្នកបើករថយន្តឈ្មោះ ផាន់ ណាហ្វី បាននាំខ្លួនមកកាន់អធិការដ្ឋាននគរបាលស្រុកព្រៃនប់ ដើម្បីសាកសួរតាមនីតិវិធី ។
រថយន្ត និង ម៉ូតូ បានយកមករក្សាទុកនៅអធិការដ្ឋាននគរបាលស្រុកព្រៃនប់៕ ឆ្លាម សមុទ្រ
