សារព័ត៌មាន នគរវត្ត តែងតែនាំមុខគេជានិច្ច
អង្គការ កាកបាទក្រហមក្នុងប្រទេស Pabua New Guinea បានប្រកាសកាល ពីថ្ងៃទី១៤ ខែមករាថា មនុស្សប្រមាណ ១,៥០០នាក់ ត្រូវបានជម្លៀសចេញពីកោះមួយកន្លែងនៃភាគខាងជើងឆ្នេរប្រទេស ដែនកោះ Papua New Guinea (PNG) ទៅកាន់ទីទួលមាន សុវត្ថិភាព បន្ទាប់ពីភ្នំភ្លើងនៅក្បែរនោះបានផ្ទុះ។
យោងតាមទីភ្នាក់ងារកាកបាទក្រហមក្នុងតំបន់ ភ្នំភ្លើងខាងលើដែលមានទីតាំងស្ថិតនៅលើកោះ Kadovar ស្ថិតនៅ ចម្ងាយ២៤គីឡូម៉ែត្រ ពីភាគខាងជើងដែន ដីគោករបស់ Papua New Guinea បានចាប់ផ្ដើមផ្ទុះតាំងពីថ្ងៃទី៥ ខែមករា មកម៉្លេះ ហើយវាក៏បានបង្ខំឱ្យអាជ្ញាធរជម្លៀសមនុស្ស ៥៩០នាក់នៅលើកោះ Kadovar ទៅកាន់ កោះ ក្បែរខាង Blup Blup រួចហើយដែរ ដើម្បីការពារពួកគេពីគ្រោះថ្នាក់ជាយថាហេតុ។
ប៉ុន្តែក្នុងរយៈពេលប៉ុន្មានថ្ងៃចុងក្រោយនេះ មានការផ្ទុះយ៉ាងខ្លាំងបញ្ចេញផេះយ៉ាងក្រាស់ឃ្មឹកទៅលើអាកាស ភ្នំភ្លើង មួយនេះបានផ្ទុះជាថ្មីទៀតកាលពីថ្ងៃសុក្រ ដោយ បញ្ចេញផ្ទាំងថ្មធំៗពណ៌ក្រហម និងស្ពាន់ ធ័រឌីអុកស៊ីតទៀតផង។
គួរបញ្ជាក់ថា កាកបាទក្រហមអន្តរ ជាតិក្នុងតំបន់ បានសម្រេចចិត្តផ្ដល់ជំនួយ ២៦.២៧៤ដុល្លារ ដល់អាជ្ញាធរ Papua New Guinea រីឯក្រសួងការបរទេសអូស្ត្រាលី លោកស្រី Julie Bishop ក៏បានប្រកាសដែរថារដ្ឋាភិបាលអូស្ត្រាលី នឹងផ្ដល់ប្រាក់ ១៩.៧៧៥ដុល្លារ ក្រោមរូបភាពជំនួយមនុស្សធម៌ដល់ប្រជាជនរងផលប៉ះពាល់៕ ម៉ែវ សាធី
