សារព័ត៌មាន នគរវត្ត តែងតែនាំមុខគេជានិច្ច
ឧត្ដរមានជ័យ ៖ នៅរសៀលថ្ងៃព្រហស្បតិ៍ ២កើត ខែមាឃ ឆ្នាំរកា នព្វស័ក ព.ស. ២៥៦១ ត្រូវនឹងថ្ងៃទី១៨ ខែមករា ឆ្នាំ២០១៨ ប្រជាពលរដ្ឋ១៥គ្រួសារ បានស្នើសុំដល់ឯកឧត្តម ស ថាវី អភិបាលខេត្តឧត្តរមានជ័យ មេត្តាជួយអន្តរាគមន៍ដល់ពួកគាត់ផង រឿងទំនាស់ដីធ្លីនៅភូមិអូរចាប់ត្រីឃុំលំទង ស្រុកអន្លង់វែង ជាមួយលោក វ៉ាន់ លីម៉េង មេបញ្ជាការរង តំបន់ប្រតិបត្តិការសឹករងស្រុកអន្លង់វែង។
ប្រជាពលរដ្ឋរងគ្រោះទាំង១៥គ្រួសារ បានឲ្យដឹងថា ដីនេះ ពួកគាត់ បានអាស្រ័យផល ដាំដុះដំណាំនៅលើបរិវេណដីព្រៃសហគមន៍ចំនួន៩៥ហិកតា គឺចាប់តាំងឆ្នាំ ២០១១រហូតមកដល់បច្ចុប្បន្ន២០១៨ នេះគឺមានរយៈពេល បានចំនួន៧ឆ្នាំ មកហើយ។
ពួកគាត់ បានបន្ដថា ដីនេះ គឺពួកគាត់បានសុំដីរបស់សហគមន៍ អាស្រ័យផលដំណាំផ្សេងៗនៅត្រង់ចំណុចភូមិអូរចាប់ត្រី ឃុំលំទង ស្រុកអន្លង់វែង ខេត្តឧត្តរមានជ័យ តែមកដល់ពេលបច្ចុប្បន្ននេះស្រាប់តែមាន ឈ្មោះ លោក វ៉ាន់ លីម៉េង មានតួនាទីជាមេបញ្ជាការរងតំបន់ប្រតិបត្តិការសឹករងស្រុកអន្លង់វែង ខេត្តឧត្តរមានជ័យ បានមកអះអាងថា ខ្លួនជាមា្ចស់ដី នឹងបានធ្វើពាក្យប្ដឹងមកលើពួកគាត់អោយដកខ្លួនចេញពីដីនេះ ទៅវិញ ព្រមទាំងបានដាក់ពាក្យបណ្ដឹងទៅតុលាកាខេត្ត ដោយចោទពលរដ្ឋថា បានរំលោភយកដីរបស់គាត់ ជាង៩៥ហិកតា ទៅវិញ ដោយដីនេះ គឺជាដីព្រៃសហគមន៍ដែលពួកគាត់ បានសុំដើម្បីបង្កបង្កើននឹងអាស្រ័យ ផលអស់រយៈពេលជាច្រើនឆាំ្ន មកហើយនោះ។
ពលរដ្ឋ បានបន្ថែមទៀតថា បន្ទាប់ពីពួកគាត់បានដឹងពីព័ត៌មាននេះ ក្នុងនាមពួកគាត់ជាប្រជាពលរដ្ឋក្រីក្រ មានការភ័យខ្លាច ក៏បាននាំគា្ន ធ្វើដំណើរពីស្រុកអន្លង់វែងមកកាន់ខេត្តឧត្តរមានជ័យ ដើម្បីសុំសហគមន៍ អាដហុក នឹងមន្ទីរទំនាក់ទំនងព្រឹទ្ធិសភា រដ្ឋសភា នឹងអធិការកិច្ចខេត្តមេត្តា ជួយរកយុត្តិធម៌ ដល់ពលរដ្ឋទាំង១៥ គ្រួសារនេះផង ព្រោះពួកគាត់ជា ពលរដ្ឋក្រីក្រ មិនអាចទប់ទល់នឹងអំណាចរបស់លោក វ៉ាន់ លីម៉េង បានឡើយ !។
មន្ត្រីអង្គការក្រៅរដ្ឋាភិបាល បានឲ្យដឹងថា រឿងនេះ គឺវាចូលដល់ថា្នក់កម្រិតព្រហ្មទណ្ឌឈានដល់ការចាប់ខ្លួនហើយ វាមិនមែនជារឿងតូចតាចសម្រាប់ពួកគាត់ឡើយ ហើយលោកនឹងបន្តចុះទៅសិក្សាផ្ទាល់ដល់ទីកន្លែងដែលមានបញ្ហា ដើម្បីបានដឹងកាន់តែច្បាស់ពីបញ្ហាទុកកង្វល់របស់បងប្អូនប្រជាពលរដ្ឋ ថាតើ ត្រូវជួយដោះស្រាយជូនពួកគាត់ដោយរបៀបណានោះ យើងនៅមិនទាន់បានដឹងនៅឡើយទេ ដោយក្នុងសំណុំរឿងរបស់ពួកគាត់គឺខាងតុលាកាបានចេញដីកា កោះហៅនៅថ្ងៃទី ២៦ ខែធ្នូ ឆាំ្ន២០១៧ នៅវេលាម៉ោង២,៣០នាទី របស់សាលាដំបូងខេត្តឧត្តរមានជ័យ តាមសំណុំរឿង ស្តីការប៉ះពាល់កម្មសិទ្ធិឯកជន នឹងធ្វើអោយខូចខាតដោយចេតនាដែលបានប្រព្រឹត្តិនៅភូមិជប់តាមោក ឃុំលំទង ស្រុកអន្លង់វែងខេត្តឧត្តរមានជ័យ តាមពាក្យបណ្ដឹងរបស់លោក វ៉ាន់ លីម៉េង កាលពីឆាំ្ន២០១៤ មកម្ល៉េះ ។
ទាក់ទងនឹងបញ្ហានេះ មិនអាចសុំការស្រាយបំភ្លឺរឿងទំនាស់ដីធ្លីនេះ ពីលោកវ៉ាន់ លីម៉េង បានទេដោយទូរស័ព្ទរបស់លោកមិនអាចខលទំនាក់ទំនងបានឡើយ៕ ប៉ែន នួន
