សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្ដាល៖ ខណៈនេះ កម្លាំងព្រហ្មទណ្ឌកម្រិតធ្ងន់ នៃស្នងការដ្ឋាននគរបាលខេត្តកណ្តាល បានបញ្ជូន ឃាតកស្រីចាក់សម្លាប់អ្នកកាសែតសម្លេងប្រជាជន មកដល់តុលាការហើយនៅថ្ងៃសុក្រ ១០កើត ខែមាឃ ឆ្នាំរកា នព្វស័ក ព.ស. ២៥៦១ ត្រូវនឹងថ្ងៃទី២៦ ខែមកា ឆ្នាំ២០១៨ ។
ស្ត្រីជាឃាតកដៃដល់មានឈ្មោះ ផេង ណាត អាយុ៣២ ឆ្នាំស្នាក់នៅផ្ទះជួលក្នុងភូមិ ព្រៃបឹង សង្កាត់កន្ទោក ពោធិ៍សែនជ័យ។
សូមជម្រាបថា៖ បុរសម្នាក់ដែលជាភ្នាក់ងារកាសែតសម្លេងប្រជាជន ត្រូវបានស្រីស្នេហ៍ចាក់សម្លាប់ចំនួន១៧កាំបិតស្លាប់យ៉ាងអាណោចអាធ័ម ក្រោយពួកគេចូលក្រេបទឹកឃ្មុំនៅក្នុងផ្ទះសំណាក់មួយកន្លែង ។
ហេតុការណ៍នេះ បង្កឱ្យមានការភ្ញាក់ផ្អើលឡើង កាលពីវេលាម៉ោង០៦ និង២០នាទីយប់ថ្ងៃទី២១ មករា ស្ថិតក្នុងបន្ទប់លេខ១១ ផ្ទះសំណាក់យីហោ «សំណាងណាស់» ក្នុងភូមិត្រពាំងសុក្រំ ឃុំបែកចាន ស្រុកអង្គស្នួល ខេត្តកណ្ដាល ។
បុរសដែលស្លាប់ឈ្មោះនួន សុភាព អាយុ៥៨ឆ្នាំ មានរបរបើកហាងកោសជប់ និងម៉ាស្សា ហើយក៏ជាអ្នកសារព័ត៌មានសំឡេងប្រជាជនផងដែរ មានទីលំនៅក្នុងភូមិស្រែអំពិល សង្កាត់ស្នោរ ខណ្ឌពោធិ៍សែនជ័យ រាជធានីភ្នំពេញ ។
ជនរងគ្រោះត្រូវបានស្រីស្នេហ៍ជាឃាតកចាក់ប្រហារចំនួន១៧កាំបិត ចំត្រង់ត្រង់ពោះ,ចង្អុលដៃស្ដាំ ខ្នងដៃខាងឆ្វេង ,បាតដៃខាងឆ្វេង,និងភ្លៅស្ដាំស្លាប់ ហើយឃាតកបានយកម៉ូតូរបស់ជនរងគ្រោះ១គ្រឿង ៕ ឆ ដា
