កំពុងលើកឈើដាក់ឡានយីឌុបបង្កប់ក្រោមដំឡូងមី កម្លាំងជំនាញទៅដល់បង្ក្រាបល្មម

ខេត្តរតនគិរី៖ រថយន្តយីឌុបមួយគ្រឿងដឹកដំឡូងមីបង្កប់ឈើឡាំងបួនជ្រុង ជាច្រើនដើមត្រូវបានកម្លាំងកងរាជអាវុធហត្ថផ្ទៃប្រទេស សហការកម្លាំងផ្នែករដ្ឋបាលព្រៃឈើលំផាត់បង្ក្រាប់ និងរឹបអូសបាន ខណៈដែលកំពុងលើករៀបដាក់នាវេលាម៉ោង៤រសៀលថ្ងៃ សុក្រ ១០កើត ខែ មាឃ ឆ្នាំរកា នព្វស័ក ព.ស២៥៦១ ត្រូវនឹងថ្ងៃទី ២៦ ខែ មករា ឆ្នាំ ២០១៨ ស្ថិតក្នុងភូមិ១សង្កាត់កាចាញ ក្រុងបានលុង រួចបញ្ជូនទរក្សាទុកនៅបរិវេណខណ្ឌ័រដ្ឋបាលព្រៃឈើខេត្តបណ្តោះអាសន្នសិន។

តាមប្រភពបានបង្ហើបថា រថយន្តយីឌុបមួយនេះ តែងតែលួចដឹកឈើបង្កប់ដំឡូងមីជាញឹកញាប់លោតឆត្រដឹកចេញពីក្រុងបានលុង ខេត្តរតនគិរីឆ្ពោះទៅប្រទេសវៀតណាមតាមច្រកទ្វារនៃខេត្តក្រចេះ និងខេត្តត្បូងឃ្មុំ។

រថយន្តយីឌុបដឹកឈើបង្កប់ដំឡូងមីនោះ មានពាក់ស្លាកលេខ កំពង់ចាម ៣A៣១៤១ ក្បាលពណ៌ស លាយក្រហម ទ្រុងខៀវ ដែលកំពុងធ្វើសកម្មភាពលើកឈើរៀបបង្កប់ដំឡូងមី ក្នុងចំការនៅភូមិ១ ហៅភូមិតាសុយ ខណៈនោះអ្នកបើកបរ និងកម្មករជាច្រើនអ្នកបានរត់គេចខ្លួនបាត់អស់ ភ្លាមៗពេលសមត្ថកិច្ចទៅដល់ អត្តសញ្ញាណម្ចាស់ឈើ និងរថយន្តមិនទាន់បានស្គាល់នៅឡើយ។

ឈើនៅលើរថយន្តនោះសមត្ថកិច្ចជំនាញមិនទាន់បានរើវាស់វែងនៅឡើយ រក្សាទុករង់ចាំស្រាវជ្រាវរកម្ចាស់ឲ្យចូលខ្លួនដោះស្រាយបន្តតាមច្បាប់ព្រៃឈើ ៕ សហការី