នារីម្នាក់បើករថយន្តម៉ាកហាយឡែនឌ័របុកម៉ូតូមួយគ្រឿងបណ្ដាយឲ្យនារីម្នាក់ទៀតរងរបួសធ្ងន់

ភ្នំពេញ៖ ករណីគ្រោះថ្នាក់ចរាចរណ៍មួយរវាងរថយន្តនិងម៉ូតូមួយគ្រឿងបណ្ដាយឲ្យនារីម្នាក់រងរបួសធ្ងន់ កាលពីវេលាម៉ោង១០និង៤៥នាទីយប់ ថ្ងៃសុក្រ ១០កើត ខែមាឃ ឆ្នាំរកា នព្វស័ក ពស២៥៦១ ត្រូវនឹងថ្ងៃទី២៦ ខែមករា ឆ្នាំ២០១៨ នៅចំណុចផ្លូវខ្វែង លើផ្លូវលេខ១១០កែងផ្លូវលេខ១៩ ភូមិ៥ សង្កាត់វត្តភ្នំ ខណ្ឌដូនពេញ រាជធានីភ្នំពេញ ។

ហេតុការណ៍នេះ បានកើតឡើងរវាងរថយន្ដមួយគ្រឿង ម៉ាកហាយឡែនឌ័រ ព័ណខ្មៅ ពាក់ស្លាកលេខ ភ្នំពេញ2AG9981 បើកបរដោយនារីម្នាក់ឈ្មោះវិសុន្វា វណ្ណសូម៉ាលី អាយុ៣១ឆ្នាំ មុខរបរជាអ្នកបកប្រែ ស្នាក់នៅផ្ទះលេខ៨Zអឺ១ ផ្លូវលេខ១៣ ភូមិ៦ សង្កាត់វត្តភ្នំ ខណ្ឌដូនពេញ ។ចំណែកជនរងគ្រោះ ភេទស្រី មិនស្គាល់អត្តសញ្ញាណ ជិះម៉ូតូមួយគ្រឿងម៉ាកហុងដា អាយខុន ព័ណក្រហម ពាក់ស្លាកលេខសៀមរាប1L6678 បណ្ដាលឲ្យរបួសធ្ងន់ កំពុងសំរាកព្យាបាលនៅមុន្ទីពេទ្យកាល់ម៉ែត ។

តាមប្រភពព័ត៍មានពីសាក្សីនៅកន្លែងកើតហេតុ បានឲ្យដឹងថា មុនពេលកើតហេតុគេឃើញ នារីរងគ្រោះជិះម៉ូតូមួយគ្រឿងម៉ាក អាយខុន ដោយធ្វើដំណើរពីត្បូងទៅជើងតាមបណ្ដោយផ្លូវ១៩ លុះជិះមកដល់កន្លែងកើតហេតុ ស្រាប់តែមានរថយន្ដមួយគ្រឿង ម៉ាកហាយឡែនឌ័រ ព័ណខ្មៅ បើកបរដោយនារីម្នាក់ ក្នុងទីសដៅពីកើតទៅលិចត្រង់ផ្លូវខ្វែងក៏ជ្រុលទៅបុកគ្នាចំពីមុខយ៉ាងពេញទំហឹង បណ្ដាលឲ្យនារីដែលជាអ្នកបើកម៉ូតូរងរបួសធ្ងន់ ហើយត្រូវបានដឹកបញ្ចូនទៅមន្ទីរពេទ្យកាល់ម៉ែត ដើម្បីសង្គ្រោះផងដែរ ។

ក្រោយកើតហេតុ ក្នុងករណីគ្រោះថ្នាក់ចរាចរណ៏នេះ សមត្ថកិច្ចមូលដ្ឋានបានប្រគល់ឲ្យនគរបាលចរាចរណ៏ក្រុងធ្វើការវាស់វែងយករថយន្ដនិងអ្នកបើកបរ រថយន្ដរួមទាំងម៉ូតូ ទៅរក្សារទុកនៅការិយាល័យ ដើម្បីធ្វើការដោះស្រាយតាមច្បាប់ ៕ស តារា