សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់បើករថយន្តសេរីទំនើប ម៉ាកRange Rover លឿនដូចហោះ មិនប្រយ័ត្ន ក៏ជ្រុលទៅបុករបាំងថ្មក្បាលព្រួញពុះចែកទ្រូងផ្លូវ បណ្តាលឲ្យរថយន្តក្រឡាប់ផ្ងារជើងម្ខាង រងរបួសធ្ងន់ខ្លួនឯង ដោយជាប់ក្នុងរថយន្តចេញមិនរួច ត្រូវប្រជាពលរដ្ឋនាំគ្នាជួយគាស់ដំបូលទាញរថយន្តចេញមក ហើយបញ្ជូនទៅមន្ទីរពេទ្យភ្លាមៗផងដែរ ។
ហេតុការណ៍គ្រោះថ្នាក់ចរាចរនេះ កើតឡើងនៅវេលាម៉ោង២រំលងអធ្រាត្រ ឈានចូលថ្ងៃអាទិត្យ ៤រោច ខែមាឃ ឆ្នាំរកា នព្វស័ក ព.ស.២៥៦១ ត្រូវនឹងថ្ងៃទី៤ ខែកុម្ភៈ ឆ្នាំ២០១៨ នៅចំណុចសួនច្បារស្តុបក្ដាន់ពីរ តាមបណ្តោយផ្លូវសហព័ន្ធរុស្សី សង្កាត់ស្រះចក ខណ្ឌដូនពេញ ។
តាមប្រភពព័ត៌មានពីសាក្សីនៅកន្លែងកើតហេតុ បានឲ្យដឹងថា មុនកើតហេតុគេឃើញបុរសម្នាក់ បើករថយន្តសេរីទំនើបមួយគ្រឿងម៉ាកRange Rover ពណ៌ខ្មៅ ពាក់ស្លាកលេខភ្នំពេញ2S-8687 បើកល្បឿនលឿនតាមបណ្តោយផ្លូវសហព័ន្ធរុស្សី ក្នុងទិសដៅពីកើតទៅលិច លុះមកដល់ចំណុចកើតហេតុ(ស្តុបក្ដាន់ពីរ) មិនប្រយ័ត្ន ក៏ជ្រុលទៅបុករបាំងថ្មក្បាលព្រួញពុះចែកទ្រូងផ្លូវ យ៉ាងពេញទំហឹង លាន់សូរដូចរន្ទះ បណ្តាលឲ្យដាច់កង់ចេញពីរថយន្តខាងមុខ និងក្រឡាប់ផ្ងារជើងមួយចំហៀង រងការខូចខាតយ៉ាងដំណំតែម្ដង។ ចំណែកអ្នកបើកបររងរបួសធ្ងន់ ជាប់ក្នុងរថយន្តចេញមិនរួច ក៏ត្រូវបានប្រជាពលរដ្ឋនាំគ្នាគាស់ដំបូលរថយន្តទាញចេញ រួចហៅរថយន្តសាមុយដឹកទៅសង្គ្រោះនៅមន្ទីរពេទ្យភ្លាមៗ ។
ក្រោយកើតហេតុសមត្ថកិច្ចមូលដ្ឋាន បានចុះមកដល់ទីតាំងកើតហេតុវាស់វែងតាមជំនាញរួចប្រគល់ឲ្យនគរបាលចរាចរណ៍ក្រុងស្ទួចយកទៅរក្សាទុកនៅការិយាល័យចរាចររាជធានីភ្នំពេញរង់ចាំដោះស្រាយតាមក្រោយ ៕ ស រស្មី
