សារព័ត៌មាន នគរវត្ត តែងតែនាំមុខគេជានិច្ច
ខេត្តបាត់ដំបង៖ នគរបាលក្រុងបាត់ដំបង បានឃាត់ខ្លួនជនសង្ស័យចំនួន២នាក់ ពាក់ព័ន្ធករណីជួញដូរគ្រឿងញៀនជាង១គីឡូក្រាម។ ករណីនេះ ធ្វើឡើងកាលពីព្រឹក ថ្ងៃទី៧ ខែកុម្ភៈ ឆ្នាំ២០១៨ ម្សិលមិញ ត្រង់ចំណុចផ្ទះសំណាក់ គាន ថៃ ក្នុងក្រុមទី៣ ភូមិកម្មករ សង្កាត់ស្វាយប៉ោ ក្រុងបាត់ដំបង។
លោកវរសេនីយ៍ទោ ប៉ាង ហៀង អធិការនគរបាលក្រុងបាត់ដំបង បានឲ្យដឹងថា ជនសង្ស័យទី១.ឈ្មោះ សាំង សេរី ហៅរ៉ា ភេទប្រុស អាយុ៣៨ឆ្នាំ ទីលំនៅភូមិកំពង់យាម ឃុំបាក់ខ្លង ស្រុកមណ្ឌលសីមា ខេត្តកោះកុង និងទី២.ឈ្មោះ លាង ដឿន ភេទប្រុស អាយុ៣៨ឆ្នាំ ទីលំនៅភូមិពោធិ ឃុំភ្នំកុង ស្រុកអង្គរជ័យ ខេត្តកំពត។
ចំណែកវត្ថុតាងដកហូត គ្រឿងញៀនប្រភេទមេតំហ្វេតាមីន(ម៉ាទឹកកក)ចំនួន ១កញ្ចប់ធំ ទម្ងន់១,០២៦.៧ក្រាម ទាំងសំបក, ទូរស័ព្ទដៃចំនួន២គ្រឿង, កាបូបដាក់លុយចំនួន២, ប្រាក់រៀលចំនួន១៦,៦០០៛, លោហៈធាតុពណ៌លឿងចំនួន១វង្ស មានដាំត្បូង, រថយន្ត Lexus (RX-300) ពណ៌សំបកឪឡឹកចំនួន១គ្រឿង។
បច្ចុប្បន្នជនសង្ស័យ កំពុងឃុំខ្លួននៅការិយាល័យជំនាញ ដើម្បីកសាងសំណុំរឿងបញ្ជូនទៅតុលាការ អនុវត្តន៍តាមនីតិវិធី៕
អត្ថបទ និងរូបភាព៖ គេហទំព័រក្នុងស្រុក
