សារព័ត៌មាន នគរវត្ត តែងតែនាំមុខគេជានិច្ច
ខេត្តបន្ទាយមានជ័យ៖ ក្រោយកម្លាំងអាវុធហត្ថខេត្តបន្ទាយមានជ័យ បានឃាត់រថយន្តក្រុងដឹកអ្នកដំណើរចំនួន៤គ្រឿង បន្ទាប់ពីរកឃើញថា លួចដឹកទំនិញគេចពន្ធ និងសាច់ជ្រូក ប្រហិត ដែលនាំចូលពីថៃដោយខុសច្បាប់ កាលពីម៉ោង១០យប់ ថ្ងៃអង្គារ ៦រោច ខែមាឃ ឆ្នាំរកា នព្វស័ក ព.ស. ២៥៦១ ត្រូវនឹងថ្ងៃទី៦ ខែកុម្ភៈ ឆ្នាំ២០១៨ តាមបណ្តោយផ្លូវជាតិលេខ៥ ត្រង់ចំណុចមុខផ្សារអូរអំបិល ស្ថិតក្នុងសង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ។
សូមបញ្ជាក់ថា ក្រោយពេលក្រុមគណៈកម្មការត្រួតពិនិត្យរថយន្ត ដែលមានទាំងមន្ត្រីជំនាញសាខាកាំកុងត្រូល មន្ត្រីសាខាគយ និងរដ្ឋាករខេត្ត ដោយមានការសម្របសម្រួលពីលោក តេង សម័យ តំណាងអយ្យការអមសាលាដំបូងខេត្តបន្ទាយមានជ័យ បានធ្វើការត្រួតពិនិត្យរួចមក ឃើញមាន៖ រថយន្តក្រុងក្រុមហ៊ុន ហ៊ាតុង ចំនួន១គ្រឿង ដឹកប្រហិតសាច់មាន់ចំនួន ២០ការ៉ុង, ប្រហិតសាច់ត្រីចំនួន ៧០កេះ, ស្ករធុង (ស្ករក្លុយកូស)ចំនួន ៨០ធុង, ពោះវៀនជ្រូកចំនួន ៣កេះ និងកាបូបចំនួន ៥ការ៉ុង។ រថយន្តក្រុងក្រុងហ៊ុន LTC ចំនួន១គ្រឿង ដឹកសារ៉ុងចំនួន ៥៥ការ៉ុង, សាប៊ូចំនួន ១៣កេះ, មុងចំនួន ២២ដុំ, កន្សែងចំនួន ១៧ដុំ, អំបោសចំនួន ២ដុំ, កម្រាលចំនួន ៤កេះ និងទឹកក្រអូបចំនួន៤កេះ។
រថយន្តក្រុងក្រុងហ៊ុន អាស៊ីបូពារ៍ៈ ចំនួន២គ្រឿង ដឹកគ្រឿងផ្សំផលិតឡេរលាបស្បែក ចំនួន ៧កេះ, ខោអាវចំនួន ៣៣ការ៉ុង, ឈើប្រវែង២ម៉ែតចំនួន ៦សន្លឹក, កម្រាលអាវម៉ូតូចំនួន ១ដុំ, ត្រីសាលម៉ុន និងពងត្រីចំនួន ១កេះ, ត្រីក្រឹមចំនួន ៣កេះ, គ្រឿងកាឡៃចំនួន ៣កេះ និងនំចំនួន៣កេះ, រថយន្តក្រុងទាំង៤គ្រឿងនេះ ត្រូវបានសមត្ថកិច្ចជំនាញ កសាងសំណុំរឿងបញ្ជូនទៅតុលាការ ដើម្បីចាត់ការតាមផ្លូវច្បាប់ហើយ ៕ សំ វិច្ឆិកា
