សារព័ត៌មាន នគរវត្ត តែងតែនាំមុខគេជានិច្ច
ខេត្តបន្ទាយមានជ័យ៖ ពលរដ្ឋខ្មែរចាស់ក្មេង២៧៤នាក់ ត្រូវបានទាហានប៉ារ៉ាថៃឃាត់ខ្លួនរយៈពេល៦ម៉ោង និងគោយន្ត៤៩គ្រឿង ក្រោយពីពលរដ្ឋខ្មែរទាំងនោះ បានធ្វើដំណើរតាមគោយន្តដឹកបន្លែ និងកសិផលឆ្លងដែនចូលទៅលក់ក្នុងផ្សារណាត់ទឹកដីថៃ ហើយចេញមកវិញដឹកជីរំលោភកម្មសិទ្ធិបញ្ញាខុសច្បាប់ ចូលមកដីខ្មែរវិញ ។
ការឃាត់ខ្លួនពលរដ្ឋខ្មែរបានធ្វើឡើងកាលពីវេលាម៉ោង១១ និង៣០នាទីព្រឹក ថ្ងៃអាទិត្យ ១១រោច ខែមាឃ ឆ្នាំរកា នព្វស័ក ព.ស. ២៥៦១ ត្រូវនឹងថ្ងៃទី១១ ខែកុម្ភៈ ឆ្នាំ២០១៨ នៅចំណុចភូមិសាមសូន្យ ឃុំតាប់ថៃ ស្រុកតាប់ប្រាយ៉ា ខេត្តស្រះកែវ ឈម និងភូមិគោកត្បែង ឃុំបន្ទាយឆ្មារ ស្រុកថ្មពួក ខេត្តបន្ទាយមានជ័យ។
ពលរដ្ឋខ្មែរទាំងនោះ បន្ទាប់មកនៅវេលាម៉ោង៥ និង៣០នាទីល្ងាចថ្ងៃដដែល ត្រូវបានទាហានថៃដោះលែងត្រឡប់មកវិញ តាមច្រកតំបន់បឹងត្រកួន ក្រោយពីកម្លាំងនគរបាលការពារព្រំដែនលេខ៨០៧ ឈរជើងនៅក្នុងភូមិសាស្រ្តតាមបន្ទាត់ព្រំដែនស្រុកថ្មពួក និងទាហានទំនាក់ទំនងព្រំដែនកម្ពុជា-ថៃ បានចូលទៅសម្របសម្រួលជាមួយអាជ្ញាធរមូលដ្ឋានថៃ និងទាហានប៉ារ៉ាថៃ ថា ប្រជាពលរដ្ឋខ្មែរដឹកជីចូលមកទឹកដីខ្មែរសម្រាប់ប្រើប្រាស់ដាក់ស្រែខ្លួនឯងប៉ុណ្ណោះ មិនបានធ្វើអាជីវកម្មនោះទេ ទើបភាគីថៃដោះលែងបងប្អូនប្រជាពលរដ្ឋខ្មែរ និងគោយន្តមកវិញ ។
លោកវរសេនីយ៍ទោ ឡុង សំណាង មេបញ្ជាការវរៈនគរបាលសេនាតូចការពារព្រំដែនគោកលេខ៨០៧ប្រាប់ឲ្យដឹងថាការឃាត់ខ្លួនប្រជាពលរដ្ឋខ្មែរទាំងនោះដោយសារទាហានថៃគេចោទថាពួកគាត់ដឹកជីហាមឃាត់ខុសច្បាប់រំលោភកម្មសិទ្ធិបញ្ញា សម្រាប់នាំមកចូលដីខ្មែរធ្វើអាជីវកម្ម ។ ក្នុងមួយគោយន្ត១០ការ៉ុងឡើងទៅ ត្រូវបានទាហានប៉ារ៉ាថៃឃាត់ទុក ចំណែក អ្នកដឹក២ទៅ៣ការ៉ុង ទាហានប៉ារ៉ាថៃមិនចាប់នោះទេ ។
លោកប្រាប់ឲ្យដឹងទៀតថា ការចាប់នោះដោយសារក្រុមហ៊ុនថៃបានប្តឹង មានអាជីវករថៃលក់ជីរំលោភកម្មសិទ្ធិបញ្ញាខុសច្បាប់ទៅឲ្យពលករដ្ឋខ្មែរ នាំចូលស្រុកខ្មែរ ប៉ះពាល់ក្រុមហ៊ុនរកស៊ីស្របច្បាប់នៅប្រទេសកម្ពុជា ដែលនាំផ្តាច់មុខជី ដូចជាសញ្ញាក្បាលគោ ជាដើមនោះ។
លោកបញ្ជាក់ឲ្យដឹងទៀតថា ក្រោយពីការដោះលែងពលរដ្ឋខ្មែរ ទាហានប៉ារ៉ាថៃក៏បានដកហូតជីក្នុងមួយគោយន្ត៣ទៅ៤ការ៉ុង។ ប្រជាពលរដ្ឋទាំងនោះ ចូលក្នុងផ្សារណាត់ថៃតាមច្រករបៀងមហោស្រប ច្រកគោកត្បែង ច្រករបៀងធ្នង់ ភ្នំដងរ៉ែក។
សូមបញ្ជាក់ថាពាក់ព័ន្ធ និងការនាំជីរំលោភកម្មសិទ្ធិបញ្ញាខុសច្បាប់ពីប្រទេសថៃចូលមកទឹកដីកម្ពុជា ក្នុងរូបភាពដឹកគោយន្តរបស់ប្រជាពលរដ្ឋខ្មែរសម្រាប់ដាក់ធ្វើស្រែនោះដែរ កន្លងមកត្រូវបានគេសង្ស័យមានប្រជាពលរដ្ឋមួយចំនួនមិនបានយកមកដាក់ស្រែនោះទេ បែរជាយកមកធ្វើអាជីវកម្មដឹកបោះលក់តាមដេប៉ូលក់ជី រឺដឹកលក់តាមស្រែចំការ ។ មន្រ្តីមន្ទីរកសិកម្មខេត្តបន្ទាយមានជ័យធ្លាប់ធ្វើការបង្រ្កាបជាច្រើនដងរួចហើយ ប៉ុន្តែការអនុវត្តនោះគ្មានប្រសិទ្ធភាពនោះទេ ដោយសារតែរងការរិះគន់ពីប្រជាពលរដ្ឋ និងអាជ្ញាធរមូលដ្ឋាន។ ការទប់ស្កាត់នៅក្នុងដីខ្មែរគ្មានប្រសិទ្ធភាពនោះហើយទើបគេសង្ស័យក្រុមហ៊ុនថៃបានប្តឹងទៅភាគីថៃឲ្យទប់ស្កាត់បែបនោះតែម្តង ៕ សំ វិច្ឆិកា
