ស្ត្រីជនជាតិអង់គ្លេសម្នាក់របួសជើងធ្ងន់ធ្ងរដោយសារក្របីវធ័នៅលើដែនកោះរ៉ុង ខេត្តព្រះសីហនុ

ខេត្តព្រះសីហនុ៖ ស្ត្រីជនជាតិអង់គ្លេសម្នាក់ត្រូវក្របីអ្នកភូមិ កោះរ៉ុង វធ័ បណ្តាលឲ្យរបួសជើងទាំងពីរយ៉ាងធ្ងន់ធ្ងរ ជនរងគ្រោះត្រូវបានសមត្ថកិច្ច ជួយដឹកបញ្ជូនមកសង្គ្រោះនៅមន្ទីរពេទ្យបង្អែកខេត្តភ្លាមៗផងដែរ ។

ហេតុការណ៍ដ៏កម្រនេះបានកើតឡើង នៅចំណុចផ្លូវទៅ លីសុីប៊ិច ស្ថិតនៅភូមិកោះរ៉ុងសន្លឹម សង្កាត់កោះរ៉ុងសន្លឹម ក្រុង-ខេត្តព្រះសីហនុកាលពីវេលាថ្ងៃត្រង់ ថ្ងៃអង្គារ ៦កើត ខែផល្គុន ឆ្នាំរកា នព្វស័ក ព.ស. ២០១៦ ត្រូវនឹងថ្ងៃទី២០ ខែកុម្ភៈ ឆ្នាំ២០១៨ ។

មន្ត្រីអាជ្ញាធរមូលដ្ឋានបានឲ្យដឹងថា ភ្ញៀវទេសចរណ៍ បរទេស ឈ្មោះ Chids Fiona ភេទស្រី អាយុ ៤៨ឆ្នាំ ជនជាតិ អង់គ្លេស ត្រូវក្របីវធ័បណ្តាលឲ្យរបួសជើងទាំងសងខាងយ៉ាងដំណំ ។

បច្ចុប្បន្នជនរងគ្រោះ ត្រូវបានបញ្ជូនតាមទូក និង បន្តបញ្ជូនទៅមន្ទីរពេទ្យបង្អែកខេត្តព្តះសីហនុ ដើម្បីទៅព្យាបាល ។

ករណីខាងលើនេះកម្លាំងនគរបាលប៉ុស្តិ៍កំពុងស្រាវជ្រាវរកម្ចាស់ក្របី ដើម្បីឲ្យមានការទទួលខុសត្រូវផងដែរ ៕ ឆ្លាមសមុទ្រ