សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ស្នាក់ការអតីតគណបក្សសង្គ្រោះជាតិ នឹងត្រូវរឹបអូសជាបណ្ដោះអាសន្ន ដោយតុលាការ ដើម្បីទូទាត់សំណងជូនដើមបណ្តឹងរដ្ឋប្បវេណី គឺ សម្តេចមហាពញ្ញាចក្រីហេង សំរិន ប្រធានរដ្ឋសភា ។
យោងតាមដីកាសម្រេចរឹបអូសជាបណ្ដោះអាសន្ន ដែលផ្សព្វផ្សាយកាលពីថ្ងៃទី២៧ ខែកុម្ភៈ បង្ហាញថា លោករស់ ពិសិដ្ឋ ចៅក្រមសាលាដំបូងរាជធានីភ្នំពេញ សម្រេចរឹបអូសជាបណ្តោះអាសន្ន ៖
១៖ រឹបអូសជាបណ្តោះអាសន្ន នូវទ្រព្យសម្បត្តិរបស់កូនបំណុលឈ្មោះ សម រង្ស៊ី ជាអចលនវត្ថុ (ដី និងអគារ) ដែលមានប័ណ្ណសម្គាល់សិទ្ធិ កាន់កាប់ អចលនវត្ថុលេខ ភព ០៩៧២៥ ចុះថ្ងៃទី១៥ ខែសីហា ឆ្នាំ២០០៧ មានទីតាំងស្ថិតនៅសង្កាត់ចាក់អង្រែលើ ខណ្ឌមានជ័យ រាជធានីភ្នំពេញ រង់ចាំតុលាការសម្រេចដល់សំណុំរឿងអង្គសេចក្តីចប់ជាស្ថាពរ។
ទី២៖ ដើម្បីទទួលបាននូវការលុបចោលការអនុវត្តការរឹបអូសជាបណ្តុះអាសន្ននេះ កូនបំណុលឈ្មោះ សម រង្ស៊ី ត្រូវផ្ញើរប្រាក់តម្កល់ នៅសាលាដំបូងរាជធានីភ្នំពេញ ចំនួន៤,២៤០,០០០,០០០ (បួនពាន់ពីររយហាសិបលានរៀល) ជាប្រាក់រំដោះ។
ទី៣៖ ប្រាក់ប្រដាប់ក្តីជាបន្ទុករបស់កូនបំណុល។
សូមបញ្ជាក់ថា លោក សម រង្ស៊ី ត្រូវបានតុលាការកំពូលសាលដីកា សម្រេចឲ្យសងសំណងជំងឺចិត្តដល់ សម្តេចពញ្ញាចក្រី ហេង សំរិន ដែលជាដើមបណ្តឹង ចំនួន 250.000.000 រៀល(ពីររយហាសិបលានរៀល) ពាក់ព័ន្ធនឹងករណីដែលលោកបង្ហោះបរិហារកេរ្តិ៍នៅលើបណ្តាញសង្គម Facebook របស់លោកដោយ ចោទប្រកាន់ សម្តេច ហេង សំរិន ថាជាអ្នកកាត់ទោស សម្តេច សីហនុ កាលដឹកនាំប្រទេស។
ជាមួយគ្នានេះ លោក សម រង្ស៊ី អតីតប្រធាននៃអតីគណបក្សសង្រ្គោះជាតិ ក៏ត្រូវបានតុលាការបង្គាប់ឱ្យសងជំងឺចិត្តសម្តេចតេជោ ហ៊ុន សែន ចំនួន៤ពាន់លានរៀល ស្មើប្រមាណ១លានដុល្លារ និងពិន័យចូលរដ្ឋប្រមាណ ១០លានរៀល ចំពោះបទបរិហារកេរ្តិ៍ជាសាធារណៈ។ ក្រៅពីនោះ លោកក៏មានសំណុំរឿងព្រហ្មទណ្ឌលជាច្រើនទៀត កំពុងស្ថិតនៅក្នុងកណ្តាប់ដៃតុលាការ៕ ចេស្តា
