ជនសង្ស័យម្នាក់លួចម៉ូតូបានយកទៅលាក់ទុកនៅក្នុងផ្ទះ ត្រូវនគរបាលស្រាវជ្រាវឃាត់ខ្លួនបាន

ខេត្តតាកែវ៖ ជនសង្ស័យម្នាក់ត្រូវបានកម្លាំងនគរបាលស្រុកព្រៃកប្បាសឃាត់ខ្លួនបន្ទាប់ពីរូបគេបានធ្វើសកម្មភាពលួចម៉ូតមួយគ្រឿង ខណៈដែលម្ចាស់ទុកចោលនៅមុខផ្សារ រួចហើយបានយកទៅលាក់ទុកនៅក្នុងផ្ទះរបស់ខ្លួន ។

ហេតុការណ៍នេះកើតឡើងនៅថ្ងៃសៅរ៍ ០២រោច ខែផល្គុន ឆ្នាំរកា នព្វស័ក ព.ស២៥៦១ ត្រូវនឹងថ្ងៃទី០៣ ខែមីនា ឆ្នាំ២០១៨ ស្ថិតនៅភូមិត្រពាំងរាំង ឃុំស្នោ ស្រុកព្រៃកប្បាស ខេត្តតាកែវ ។

នគរបាលស្រុកព្រៃកប្បាស បានឲ្យដឹងថា ជនសង្ស័យខាងលើឈ្មោះ សូ ផាន់ ភេទប្រុស អាយុ៣៩ឆ្នាំ រស់នៅភូមិឃុំ កើតហេតុខាងលើ ដោយរូបគេបានធ្វើសកម្មភាពលួចម៉ូតូមួយគ្រឿងម៉ាកហុងដា C125 ពណ៌ខ្មៅ សេរី២០១៤ ដែលជាកម្មសិទ្ធរបស់ឈ្មោះ ជី ដា ភេទប្រុស អាយុ៥០ឆ្នាំ រសមនៅភូមិទង្កែ ឃុំស្នោ ស្រុកព្រៃកប្បាស ខណៈទុកចោលមុខផ្សារ ។

ក្រោយពេលទទួលបានព័ត៌មានភ្លាម កម្លាំងជំនាញអធិការដ្ឋាននគរបាកស្រុកព្រៃកប្បាស សហការជាមួយកម្លាំងប៉ុស្តិ៍នគរបាលរដ្ឋបាលស្នោ បានស្រាវជ្រាវ និងកំណត់មុខសញ្ញារហូតឈានដល់ឃាត់ខ្លួនបានជនសង្ស័យខាងលើ និងបានដកហូតម៉ូតមួយគ្រឿងដែលបានយកទៅលាក់ទុកនៅផ្ទះរបស់ខ្លួន ។

បច្ចុប្បន្នជនសង្ស័យ កម្លាំងជំនាញកំពុងកសាងសំណុំរឿងបញ្ជូនទៅសាលាដំបូងខេត្ត ដើម្បីចាត់ការតាមផ្លូវច្បាប់ ៕ ភ្នំដា