សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ យុវជន២នាក់បានរងរបួសធ្ងន់ត្រូវបានរថយន្តសង្គ្រោះដឹកទៅមន្ទីរពេទ្យភ្លាមៗ ខណៈជិះម៉ូតូលឿនមិនប្រយ័ត្នជ្រុលទៅបុក និងរថយន្តក្រឡក់សុីម៉ងត៍ពេញទំហឹង កាលពីវេលាម៉ោង១១ និង៤០នាទីយប់ ថ្ងៃព្រហស្បតិ៍ ៧រោច ខែផល្គុន ឆ្នាំរកា នព្វស័ក ព.ស. ២៥៦១ ត្រូវនឹងថ្ងៃទី៨ ខែមីនា ឆ្នាំ២០១៨ នៅចំណុចមុខហាងហេហេង២ តាមបណ្តោយផ្លូវមន្ទីររ៉េត ស្ថិតក្នុងសង្កាត់ស្ទឹងមានជ័យ២ ខណ្ឌមានជ័យ ។
តាមសាក្សីនៅកន្លែងកើតហេតុបានឲ្យដឹងថា នៅមុនពេលកើតហេតុគេបានឃើញរថយន្តក្រឡក់សុីម៉ងត៍ ពាក់ស្លាកលេខ ភ្នំពេញ 5A 0538 ធ្វើដំណើរតាមបណ្តោយផ្លូវមុនីរ៉េត ក្នុងទិសដៅពីជើងទៅត្បូង ខណៈមកដល់ចំណុចកើតហេតុ ក៏បានបតឆ្វេងឆ្លងផ្លូវចូលទៅផ្លូវបេតុងស្រាប់តែមានម៉ូតូម៉ាកស្មាស់រេវ៉ូ ពណ៌ខ្មៅ ពាក់ស្លាកលេខកំពង់ធំ 1H3326 បើកបរដោយបុរសម្នាក់ និងមានបុរសម្នាក់ទៀតរួចដំណើរជាមួយធ្វើដំណើរតាមណ្តោយផ្លូវមុនីរ៉េតក្នុងទិសដៅពីត្បូងទៅជើងក្នុងល្បឿនលឿនក៏ជ្រុលបុករថយន្តពេញទំហឹងបណ្តាលឲ្យរងរបួសធ្ងន់ទាំង២នាក់ ចំណែកម៉ូតូ និងរថយន្តរងការខូចខាយ ។
ក្រោយពេលកើតហេតុជនរងគ្រោះត្រូវបានរថយន្តសង្គ្រោះដឹកទៅមន្ទីរពេទ្យភ្លាមៗចំណែករថយន្ត និងម៉ូតូត្រូវបានសមត្ថកិច្ចវាស់វែងយកទៅរក្សាទុកនៅការិយាល័យចរាចរណ៍ជើងគោករាជធានីភ្នំពេញ រង់ចាំដោះស្រាយពេលក្រោយ ៕ សុខាសែនជ័យ
