សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ កម្លាំងប៉ុស្តិ៍នគរបាលរដ្ឋបាលផ្សារកណ្តាលទី១ នៃអធិការដ្ឋាននគរបាលខណ្ឌដូនពេញ បានឃាត់ខ្លួនជនសង្ស័យម្នាក់ ក្រោយធ្វើសកម្មភាពឆក់កាបូបស្ពាយពីស្រ្តីជនជាតិបរទេសម្នាក់បានសម្រេចហើយព្យាយាមជិះម៉ូតូរត់គេខ្លួន តែត្រូវជនរងគ្រោះស្រែកថាចោរ ៗ ទើបបង្កការភ្ញាក់ផ្អើលដល់ប្រជាពលរដ្ឋជាច្រើននាំគ្នាជិះម៉ូតូដេញតាម ហើយជនសង្ស័យភ័យស្លន់ស្លោរ បានជិះម៉ូតូព្យាយាមគេចខ្លួនរហូតទៅដល់ចំណុចកើតហេតុខាងលើ ក៏ត្រូវបានប្រពលរដ្ឋព័ទ្ធចាប់បាន និងព្រួតគ្នាវាយឡើងបែកមុខមាត់ ហូរឈាមប្រឡាក់ពេញខ្លួនតែម្តង ។
ករណីឃាត់ខ្លួនជនសង្ស័យខាងលើនេះ បានធ្វើឡើងកាលពីវេលាម៉ោង៨និង៣០នាទីយប់ ថ្ងៃចន្ទ ៣កើតខែចេត្រ ឆ្នាំរកា នព្វស័ក ព.ស២៥៦១ ត្រូវនឹងថ្ងៃទី១៩ ខែមីនា ឆ្នាំ២០១៨ ពីបទ លួចមានស្ថានទម្ងន់ទោសប្រើអំពើហិង្សា(ជិះម៉ូតូឆក់កាបូបស្ពាយជនបរទេស) នៅចំណុចមុខផ្ទះលេខ១២៦ផ្លូវលេខ១៣៦កែងផ្លូវលេខ១៣ ភូមិទី១១ សង្កាត់ផ្សារកណ្តាលទី១ ខណ្ឌដូនពេញ រាជធានីភ្នំពេញ ។
ជនសង្ស័យត្រូវឃាត់ខ្លួនឈ្មោះឆេង លីន ភេទប្រុសអាយុ៣៥ឆ្នាំជនជាតិខ្មែរមុខរបរមិនពិតប្រាកដមានទីលំនៅផ្ទះលេខ១៨អឺ១ផ្លូវលេខ៥៣សង្កាត់ផ្សារថ្មីទី១ខណ្ឌដូនពេញរាជធានីភ្នំពេញ ត្រូវប្រជាពលរដ្ឋនាំគ្នាព្រួតវាយបណ្តាលអោយរបួសបែកមុខ.ក្បាលហូរឈាម ។ វត្ថុតាងចាប់យកបាន កាបូបស្ពាយពណ៌លឿងចំនួន០១ដែលមានលិខិតឆ្លងដែនចំនួន០២ក្បាល.ទូរស័ព្ទដៃម៉ាកសាំស៊ុងមួយ.កាតATMនិងលុយមួយចំនួន(បានប្រគល់អោយជនរងគ្រោះវិញ).ម៉ូតូមួយគ្រឿងម៉ាកស្មាស់ពណ៌ខ្មៅពាក់ស្លាកលេខភ្នំពេញ1BB4126ជារបស់ជនសង្ស័យជិះធ្វើសកម្មភាព។ ចំណែកជនរងគ្រោះឈ្មោះVERA LUCIA PEREIRA LIMA ភេទស្រីអាយុ៣៨ឆ្នាំជនជាតិព័រទុយហ្កាល់កាន់លិខិតឆ្លងដែនលេខN410731 មុខរបរទេសចរណ៍ស្នាក់នៅសណ្ឋាគារHIG LITLANDផ្លូវលេខ១៧៤សង្កាត់ផ្សារថ្មីទី៣ខណ្ឌដូនពេញរាជធានីភ្នំពេញ។
យោងតាមប្រភពព័ត៌មានពីប្រជាពលរដ្ឋបានឲ្យដឹងថា មុនពេលកើតហេតុ គេឃើញជនសង្ស័យខាងលើបានជិះម៉ូតូមួយគ្រឿងម៉ាក ស្មាស់វី ពណ៌ខ្មៅ ពាក់ស្លាកលេខ ភ្នំពេញ 1BB -4126 តែម្នាក់ឯង បានធ្វើសកម្មភាពឆក់កាបូបពីស្ត្រីម្នាក់ដើរជាមួយប្ដី ដែលជនរងគ្រោះជាជនជាតិបរទេស បានសម្រេចនៅតាមដងផ្លូវព្រះនរោត្ដម ក្បែររោងកុនលុច ។ ភ្លាមនោះ ប្រជាពលរដ្ឋដែលឃើញសកម្មភាពជាក់ស្ដែងបែបនេះ ក៏ស្រែកថា ចោរៗៗ ទើបបង្កការភ្ញាក់ផ្អើលដល់ប្រជាពលរដ្ឋជាច្រើននាំគ្នាជិះម៉ូតូដេញតាម ហើយជនសង្ស័យភ័យស្លន់ស្លោរ បានជិះម៉ូតូព្យាយាមគេចខ្លួនរហូតទៅដល់ចំណុចកើតហេតុខាងលើ ក៏ត្រូវបានប្រពលរដ្ឋព័ទ្ធចាប់បាន និងព្រួតគ្នាវាយឡើងបែកមុខមាត់ ហូឈាមជោកខ្លួន ទើបសមត្ថកិច្ចមូលដ្ឋានចុះទៅដល់ ដាក់ខ្នោះជនសង្ស័យ និងនាំយកម៉ូតូដែលធ្វើសកម្មភាព ព្រមទាំងវត្ថុតាងនិងជនរងគ្រោះ យកមកប៉ុស្ដិ៍នគរបាលរដ្ឋបាលផ្សារថ្មី១ ។
ក្រោយកើតហេតុសមត្ថកិច្ចឃាត់ខ្លួននិងធ្វើតេសទឹកនោមជនសង្ស័យរកឃើញធ្លាប់ប្រើប្រាស់គ្រឿងញៀនហើយបច្ចុប្បន្នកំពុងឃាត់ខ្លួននៅអធិការដ្ឋាននគរបាលខណ្ឌដូនពេញដើម្បីកសាងសំណុំរឿងតាមនិតិវិធី ៕ស តារា
