សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្ដាលៈ ជនសង្ស័យជាមុខសញ្ញាជួញដូរថ្នាំញៀនយ៉ាងសកម្មម្នាក់ត្រូវបានសមត្ថកិច្ចស្រុកពញាឮធ្វើការចាប់ខ្លួន និងដកហូតថ្នាំញៀនចំនួន៤កញ្ចប់ផងដែរ ។ ករណីចាប់ខ្លួនខាងលើនេះធ្វើឡើង នៅវេលាម៉ោង១១និង៣០នាទីព្រឹក ថ្ងៃពុធ ៥កើត ខែចេត្រ ឆ្នាំ រកា នព្វស័ក ព.ស.២៥៦១ ត្រូវនឹងថ្ងៃទី២១ ខែមីនា ឆ្នាំ២០១៨ ស្ថិតក្នុងភូមិទួលងោក ឃុំកំពង់លួង ស្រុកពញាឮ ខេត្តកណ្តាល ។
មន្រ្ដីនគរបាលផ្នែកប្រឆាំងគ្រឿងញៀនស្រុកពញាឮបានឲ្យដឹងថា ជនសង្ស័យចាប់ខ្លួនបានមានឈ្មោះ យ៉ើ សាឡេះ ហៅ ពេជ្រ ភេទប្រុស អាយុ១៨ឆ្នាំ ជនជាតិខ្មែរឥស្លាម មុខរបរ នេសាទ មានទីលំនៅភូមិទួលងោក ឃុំកំពង់លួង ស្រុកពញាឮ ខេត្តកណ្តាល ។ ចំណែកវត្ថុតាងដកហូតបានមាន៖ ថ្នាំញៀនប្រភេទមេតំហ្វេតាមីនហៅម៉ាទឹកកកចំនួន៤កញ្ចប់ ,ប្រាក់រៀលចំនួន៤៥០០០រៀល និងឧបករណ៏វេចខ្ចប់និងប្រើប្រាស់គ្រឿងញៀនមួយចំនួនទៀតផងដែរ ។
ប្រភពដដែលបន្ដថា ជនសង្ស័យខាងលើគឺជាមុខសញ្ញាជួញដូរថ្នាំញៀនយ៉ាងសកម្មក្នុងភូមិសាស្រ្ដស្រុកពញាឮ ដែលសមត្ថកិច្ចបានកំណត់និងតាមដានជាយូរមកហើយ ។ លុះមកដល់ថ្ងៃទី២១ ខែមីនា ឆ្នាំ២០១៨ សមត្ថកិច្ចបានទទួលព័ត៌មានថា ជនសង្ស័យខាងលើ បានទៅភ្នំពេញដើម្បីទិញថ្នាំញៀនយកមកលក់ នៅក្នុងភូមិសាស្រ្ដស្រុកពញាឮ ភ្លាមនោះសមត្ថកិច្ចជំនាញស្រុក ក៏បានធ្វើការពួនស្ទាក់ចាប់ខ្លួនជនសង្ស័យត្រង់ចំណុចភូមិ/ឃុំកើតហេតុខាងលើ រួចឆែកឆេរបានរកឃើញថ្នាំញៀនចំនួន៤កញ្ចប់ និងធ្វើការបញ្ជូនខ្លួនជនសង្ស័យយកមកអធិការដ្ឋាននគរបាលស្រុកដើម្បីចាត់ការតាមនីតិវិធីច្បាប់ ។
នៅចំពោះមុខសមត្ថកិច្ច ជនសង្ស័យឈ្មោះ យ៉ើ សាឡេះ ហៅពេជ្រ បានសារភាពថា ថ្នាំញៀន៤កញ្ចប់តូចនេះ គឺខ្លួនយកមកលក់ ដោយលក់ក្នុង១កញ្ចប់តូច តម្លៃ២ម៉ឺនរៀល ។ ចំពោះថ្នាំញៀននេះដែរ ខ្លួនទិញពីបុរសម្នាក់ នៅចំណុចភូមិប្រឡាយ ខណ្ឌព្រែកព្នៅ រាជធានី ៕ ស្អាងជ័យ
