សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ព្រោះតែខ្វះការយោគយល់គ្នារវាងអ្នកជិតខាងបង្កឲ្យមានទំនាស់ពាក្យសម្តីឈានដល់កើតអំពើហិង្សាវាយគ្នាទៅវិញទៅមកធ្វើឲ្យរងរបួសតិចតួច ចុងក្រោយសមត្ថកិច្ចឃាត់ខ្លួនទាំងពីរនាក់។
អំពើហិង្សានេះកើតឡើងថ្ងៃ ព្រហស្បតិ៍ ៦ កើត ខែ ចេត្រ ឆ្នាំរកា នព្វស័ក ព.ស.២៥៦១ ត្រូវនឹងថ្ងៃទី២២ ខែ មីនា ឆ្នាំ ២០១៨ វេលាម៉ោង១៩និង៣០នាទីយប់នៅចំណុចផ្លូវបេតុង ភូមិសំរោង សង្កាត់ឃ្មួញ ខណ្ឌសែនសុខ។
សមត្ថកិច្ចប្រាប់ថា ភាគីទី១/ឈ្មោះ ម៉ម ផលឫទ្ធិសក្ត័ ហៅភ័ក្តី ភេទប្រុស អាយុ២៣ឆ្នាំ មុខរបរសន្តិសុខឯកជន ស្នាក់នៅផ្ទះលេខ២៣ផ្លូវ១៨៤ ភូមិសំរោង សង្កាត់ឃ្មួញ ខណ្ឌសែនសុខ។ភាគីទី២/ឈ្មោះ ទូច វិចិត្រ ភេទប្រុសអាយុ៣៣ឆ្នាំ មុខរបរលក់ដូរ ស្នាក់នៅភូមិសំរោង សង្កាត់ឃ្មួញ ខណ្ឌសែនសុខ។
សមត្ថកិច្ចបានប្រាប់ឲ្យដឹងថា នៅមុនពេលកើតហេតុម្តាយខាងភាគីទី១ឈ្មោះ ចន កាន អាយុ៤៥ឆ្នាំបានជេរទៅលើភាគីទី២ដោយសង្ស័យថា បានយកដុំថ្មគប់មកលើដំបូលផ្ទះរបស់គាត់ ទើបក្លាយជាទំនាស់ជេរគ្នាទៅវិញទៅមក។ ភ្លាមនោះកូនប្រុសរបស់គាត់ ឈ្មោះ ម៉ម ផលឫទ្ធិសក្ត័ ហៅភ័ក្តី បានចេញពីក្នុងផ្ទះយកកាំបិតប័ុងតោ និងឈើគប់មកលើភាគីទី២ ពេលនោះ ភាគីទី២ទស្ទុះទៅចាប់យកឈើពីម្តាយភាគីទី១ បណ្តាលឲ្យម្តាយត្រូវរបួសក្បាល បន្តិចបន្តួចហើយក្រោយមកត្រូវសមត្ថកិច្ចឃាត់ខ្លួនយកមកសាកសួរនៅអធិការដ្ឋាននគរបាលខណ្ឌសែនសុខតែម្តង ។
បច្ចុប្បន្នភាគីទំនាស់ទាំងពីកំពុងឃាត់ខ្លួននៅអធិការដ្ឋាននគរបាលខណ្ឌសែនសុខ ដើម្បីកសាងសំណុំរឿងបញ្ជួនទៅតុលាកានៅពេលក្រោយ ៕ តុង សីហា
