សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ហេតុការណ៍ភ្ញាក់ផ្អើលមួយបន្ទាប់ពីនារីម្នាក់ទុក្ខមុខរោងចក្រ ដែលនៅក្បែរផ្សារហើយដើរចូលទៅទិញម្ហូបពេលចេញមកវិញបាត់ម៉ូតូមិនដឹងទៅណា ។
ហេតុការណ៍នេះ បានកើតឡើងកាលពីវេលាម៉ោង៦និង២០នាទីព្រលប់ ថ្ងៃអង្គារ ៣រោច ខែចេត្រ ឆ្នាំរកា នព្វស័ក ព.ស.២៥៦១ ត្រូវនឹងថ្ងៃទី៣ ខែមេសា ឆ្នាំ២០១៨ នៅមុខរោងចក្រអាមេរិកកាំងជាប់ផ្លូវវេងស្រេង ភូមិជ្រៃកោង សង្កាត់ចោមចៅ២ ខណ្ឌពោធិ៍សែនជ័យ ។
ម៉ូតូម៉ាកហុងដាឌ្រីម ស៊េរីឆ្នាំ២០១៦ ពណ៌ខ្មៅ ពាក់ស្លាកលេខ ភ្នំពេញ 1FP-9868 ជាកម្មសិទ្ធរបស់ឈ្មោះ សុន ស្រីណេត ភេទស្រី អាយុ២៣ឆ្នាំ មុខរបរកម្មករោងចក្រ ស្នាក់នៅផ្ទះជួលភូមិជ្រៃកោង សង្កាត់ចោមចៅ២ ខណ្ឌពោធិ៍សែនជ័យ មានស្រុកកំណើតនៅជម្រៅ ឃុំតាំយ៉ាប ស្រុកព្រែកកប្បាស ខេត្តតាកែវ ។
តាមប្រភពព័ត៌មានពីជនរងគ្រោះបាននិយាយថា នៅមុនពេលកើតហេតុរូបនាងបានជិះម៉ូតូទៅទិញសាច់ជ្រូកដើម្បីធ្វើម្ហូបហើយបានទុកម៉ូតូនៅខាងមុខរោងចក្រដោយចាក់សោ.ក តែមិនបានបិទសន្ទះទេ ហើយចូលទៅទិញសាច់ជ្រូករយៈពេលប្រមាណ៧នាទីបានទិញរួចរាល់ហើយបានត្រឡប់ទៅកន្លែងទុកម៉ូតូវិញស្រាប់តែបាត់ម៉ូតូ រូបគាត់បានសួរនៅជិតកន្លែងកើតហេតុមាននារីម្នាក់បានឃើញជនសង្ស័យម្នាក់អាយុប្រមាណជិត៤០ឆ្នាំបានជិះម៉ូតូចេញភ្លាមផងដែរ ។
នារីរងគ្រោះបានបន្តទៀតថា ជារៀងរាល់ថ្ងៃគាត់តែងមកពីធ្វើការហើយមកទិញម្ហូបនៅមុខរោងចក្រខាងលើជារៀងរាល់ថ្ងៃដោយមិនដែលមានបញ្ហាឡើយតែប្រជាពលរដ្ឋនៅកន្លែងកើតហេតុបាននិយាយថា ទីតាំងខាងលើតែងតែបាត់ម៉ូតូជាច្រើនលើកមកហើយពេលខ្លះមួយថ្ងៃបាត់អស់២គ្រឿងក៏មានដែរ ។ ប្រជាពលរដ្ឋបានបន្តទៀតថា លួចនោះលួចដល់ហើយសឹងរាល់ថ្ងៃ ហើយសមត្ថកិច្ចមិនដែលចាត់វិធានការចាប់ជនសង្ស័យបានម្តងណាឡើយ ។
ក្រោយពេលកើតហេតុជនរងគ្រោះបានទៅដាក់ពាក្យបណ្ដឹងភ្លាមៗនៅប៉ុស្តិ៍នគរបាលរដ្ឋបាលចោមចៅ២ ដើម្បីឱ្យសមត្ថកិច្ចជួយស៊ើបអង្កេត និងតាមឃាត់ខ្លួនជនសង្ស័យមកផ្តន្ទាទោសតាមច្បាប់ ៕ សុខាសែនជ័យ
