សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ធំ៖ សពបុរសមានសតិមិនប្រក្រតីម្នាក់ត្រូវបានគេប្រទះឃើញដួលស្លាប់ នៅក្នុងដីឡូត៍មួយកន្លែង បានបង្ករឲ្យមានការភ្ញាក់ផ្អើលមួយកាលពីវេលាម៉ោង១៤និង៣៥នាទីរសៀល ថ្ងៃព្រហស្បតិ៍ ៥កើត ខែពិសាខ ឆ្នាំច សំរឹទ្ធិស័ក ព.ស. ២៥៦២ ត្រូវនឹងថ្ងៃទី១៩ ខែមេសា ឆ្នាំ២០១៨ ។
សមត្ថកិច្ចបានឲ្យដឹងថា៖ ជនរងគ្រោះឈ្មោះ ឌុច វណ្ណា ភេទប្រុស អាយុ ៣១ឆ្នាំ ជនជាតិខ្មែរ រស់នៅភូមិកំពង់រទេះ សង្កាត់កំពង់រទះ ក្រុងស្ទឹងសែន ខេត្តកំពង់ធំ បានដួលដេកស្លាប់នៅចំណុចដីឡូចាក់ថ្មីមួយកន្លែងស្ថិតនៅភូមិបល្ល័ង្កលិច សង្កាត់ដំរីជាន់ខ្លា ក្រុងស្ទឺងសែន ខេត្តកំពង់ធំ។
តាមការធ្វើកុសល្យវិច័យសាកសព ដោយមានការចូលរួមពីបុគ្គលិកមន្ទីរពេទ្យបង្អែក, ផ្នែកជំនាញ នគរបាលក្រុង និងប៉ុស្តិ៍នគរបាលរដ្ឋបាលដំរីជាន់ខ្លា ពិនិត្យឃើញថា សពមានស្លាកស្នាម មានរបួសបាតជើងខាងស្តាំ ទំនងជាពងជើង ហើយរយះស្បែកបាតជើង និងចំស្មងជើង ជង្គង់ទាំងពីរមានស្នាមរបួស រលាត់ស្បែកតូចៗជាច្រើនកន្លែង ជាស្លាកស្នាមមុតនឹងគំនរក្រួសថ្មដែលចាក់ក្នុងដីឡូត៍នោះ ក្រៅពីនោះមិនមានស្លាកស្នាមអ្វីគួរឲ្យកត់សម្គាល់ទេ ។ តាមការសន្និដ្ឋានរបស់គ្រូពេទ្យ និងជំនាញថា៖ ការស្លាប់នៃជននេះបណ្តាលមកពីហេវហត់អត់អាហារ អស់កម្លាំងកើត ជាខ្យល់ គរ គាំងបេះដូងស្លាប់ ។
បន្ទាប់ពីពិនិត្យរួចសពត្រូវបានប្រគល់ឲ្យបងប្រុសរបស់ជនរងគ្រោះឈ្មោះ ឌុច វណ្ណៈ ភេទប្រុស អាយុ ៣៣ឆ្នាំ នៅភូមិ/សង្កាត់ជាមួយគ្នា និងប្រាក់រៀលដែលអ្នកផងបានចូលជាទានដល់សព ចំនួន ៥៣៧៥០០៛ ដើម្បីធ្វើបុណ្យតាមប្រពៃណី៕ ប៊ុនរិទ្ធី
