ឃើញរថយន្តចតចោលតាំងពីមុនចូលឆ្នាំខ្មែររាយការណ៍ជូននគរបាលចុះមកពិនិត្យ

ភ្នំពេញ៖ រថយន្តប្រភេទដឹកទំនិញមួយគ្រឿង ត្រូវបានប្រជាពលរដ្ឋប្រទះឃើញគេ យកមកចតចោលតាំងពីមុនបុណ្យចូលឆ្នាំខ្មែរមកម្ល៉េះ មិនឃើញម្ចាស់មកយកវិញទេ ទើបរាយការណ៍ប្រាប់សមត្ថកិច្ចមូលដ្ឋានមកពិនិត្យ ។

ហេតុការណ៍នេះ ភ្ញាក់ផ្អើលនៅថ្ងៃសុក្រ ៦កើត ខែពិសាខ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី២០ ខែមេសា ឆ្នាំ២០១៨ វេលាម៉ោង៧ព្រឹក នៅមុខផ្ទះល្វែងសង់ថ្មីផ្លូវ១០១១ ភូមិឧកញ៉ាវាំង សង្កាត់ភ្នំពេញថ្មី ខណ្ឌសែនសុខ។

រថយន្តដែលយកមកផ្លុងចោលខាងលើម៉ាក SOJEN ពណ៌ស ដោះស្លាកលេខចេញ ប្រភេទដឹកទំនិញ ទំងន់មួយតោន មានក្លុបពីក្រោយជិត។

សមត្ថកិច្ចបានប្រាប់ថា មានប្រជាពលរដ្ឋរាយការណ៍មកប្រាប់ថា ប្រទះឃើញរថយន្តខាងលើត្រូវបានគេបើកយកមកទុកចោលតាំងពីមុនបុណ្យចូលឆ្នាំថ្មីប្រពៃណីជាតិខ្មែរមកម្លេះមិនឃើញមកយកវិញទេដោយខ្លាចរថយន្តខាងលើមានពាក់ព័ន្ធ និងបទល្មើសទើបរាយការណ៍មកសមត្ថកិច្ចចុះពិនិត្យតែម្តង។

សមត្ថកិច្ចបានប្រាប់ទៀតថាក្រោយពីសមត្ថកិច្ចចុះពិនិត្យរថយន្តខាងលើនេះឃើញថាស្លាកលេខរថយន្តត្រូវបានគេដោះចេញចំណែកឡូហ្គោលជុំវិញរថយន្តក៏គេហែកចេញទាំងអស់ដោយសង្ស័យពាក់ព័ន្ធបទល្មើស ទើបបានរាយការណ៍បន្តទៅលោកវរៈសេនីយ៍ឯក ហួរ ម៉េងវ៉ាង អធិការនគរបាលសែនសុខទើបលោកបញ្ជាឲ្យយករថយន្តខាងលើយកមករក្សាទុកនៅប៉ុស្តិ៍នគរបាលរដ្ឋបាល ភ្នំពេញថ្មីបណ្តោះអាសន្នសិនដោយរង់ចាំស្រាវជ្រាវរកម្ចាស់ពេលក្រោយ៕ តុង សីហា