សារព័ត៌មាន នគរវត្ត តែងតែនាំមុខគេជានិច្ច
ខេត្តពោធិ៍សាត់៖ បុរសស្រ្តីចំនួន ៤នាក់បានរងរបួសយ៉ាងដំណំ ដោយគ្រោះថ្នាក់ចរាចរណ៍ពីផ្សេងគ្នា រថយន្តផ្ទុះកង់ធ្លាក់ជ្រោះ និងអ្នកជិះម៉ូតូបុកអ្នកជិះកង់ស្របទិសគ្នា។
របាយការណ៍នគរបាលស្រុកវាលវែងបង្ហាញថា នៅវេលាម៉ោង៧ និង១៥នាទី យប់ ថ្ងៃសៅរ៍ ៦រោច ខែពិសាខ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី៥ ខែឧសភា ឆ្នាំ២០១៨ នៅលើកំណាត់ផ្លូវជាតិលេខ៥៥ ត្រង់ចំណុចចុះចំណោទភ្នំចិនយំ ស្ថិតក្នុងភូមិស្ទឹងថ្មី ឃុំប្រម៉ោយ ស្រុកវាលវែង ខេត្តពោធិ៍សាត់ មានករណីគ្រោះថ្នាក់ចរាចរណ៍ដ៍ព្រឺព្រួចមួយ រថយន្តធុនធំ ១គ្រឿងម៉ាក ហុីយ៉ាន់ដាយ ពណ៏ខៀវ ពាក់ស្លាកលេខ កំពង់ចាម 3A 0748 ដឹកផលអនុផលព្រៃឈើពេញ ធ្វើចរាចរណ៍ក្នុងទិសដៅពីលិចឆ្ពោះទៅទិសខាងកើត លុះមកដល់ចំណុចកើតហេតុស្រាប់តែផ្ទុះកង់មុខផ្នែកខាងឆ្វេង រួចរេចង្កូតបុករបាំងដែកសុត្ថិភាពផ្លូវខូចអស់ប្រវែងចំនួន ៦៨ម៉ែត្រ និងបាក់បង្គោលអស់ចំនួន ១៧ដើម ទើបក្រឡាប់ច្រើនត្រឡប់ធ្លាក់ជ្រោះផ្នែកខាងឆ្វេងដៃ បណ្ដាលឲ្យខូចខាតរថយន្តទាំងស្រុង និងរងរបួសតែកុង និងព្រូស្រីយ៉ាងដំណំផងដែរ។
ដោយឡែក៖ នៅវេលាម៉ោង៨ និង៤៥នាទីព្រឹក ថ្ងៃអាទិត្យ ៧រោច ខែពិសាខ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី៦ ខែឧសភា ឆ្នាំ២០១៨ នៅលើកំណាត់ផ្លូវលំក្រាលគ្រួសក្រហម ស្ថិតក្នុងភូមិទឹកលាច ឃុំត្នោតជុំ ស្រុកក្រគរ ខេត្តពោធិ៍សាត់ ត្រូវបាននគរបាលស្រុកក្រគរប្រាប់ឲ្យដឹងដែរថា មានករណីគ្រោះថ្នាក់ចរាចរណ៍មួយបានកើតឡើងផងដែរ បង្កឡើងដោយអ្នកជិះម៉ូតូ ១គ្រឿងធ្វើដំណើរក្នុងទិសដៅពីត្បូងឆ្ពោះទៅទិសខាងជើង លុះមកដល់ចំណុចកើតហេតុបានជ្រុលបុកអ្នកកង់ពីក្រោយពេញទំហឹង បណ្ដាលឲ្យរងរបួសយ៉ាងដំណំទាំងសង់ខាងផងដែរ។
ប្រភពព័ត៌មានទាំងពីករណីខាងលើបន្តទៀតថា ភ្លាមៗនោះជនរងរបួសត្រូវបានគេចាត់ចែងបញ្ជូនទៅសង្រ្គោះ ចំណែកវត្ថុតាងត្រូវបានមន្រ្តីជំនាញផ្នែកសណ្ដាប់ធ្នាប់យកទៅរក្សាទុកជាសណ្ដោះអាសន្ន ដើម្បីរងចាំបន្តធ្វើការដោះស្រាយគ្នាតាមនីតិវិធី ៕ ប៉ឹម ប៉ិន
