សារព័ត៌មាន នគរវត្ត តែងតែនាំមុខគេជានិច្ច
ខេត្តសៀមរាប ៖ កូនប្រុសចិត្តតិច្ឆានដែលចាក់សម្លាប់ឪពុកខ្លួនឯងស្លាប់ក្នុងថ្លុកឈាមយ៉ាងសហាវឃោឃៅនោះត្រូវបានកម្លាំងនគរបាលខេត្តសៀមរាបសហការជាមួយនគរបាលក្រសួងមហាផ្ទៃ និងនគរបាលខេត្តព្រះសីហនុ ស្រាវជ្រាវរហូតឈានដល់ឃាត់ខ្លួន នៅរសៀលថ្ងៃអង្គារ ១៥កើត ខែជេស្ឋ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី២៩ ខែឧសភា ឆ្នាំ២០១៨ នៅខេត្តព្រះសីហនុ ។
លោកឧត្តមសេនីយ៍ត្រី ភឹង ចន្តារ៉េត ស្នងការរង នគរបាលខេត្តទទួលបន្ទុកកណ្តាលព្រហ្មទណ្ឌ ខេត្តសៀមរាប បានឲ្យដឹងនៅរសៀលថ្ងៃអង្គារ ១៥កើត ខែជេស្ឋ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី២៩ ខែឧសភា ឆ្នាំ២០១៨ថា កម្លាំងនគរបាលខេត្តសៀមរាបសហការជាមួយនគរបាលក្រសួងមហាផ្ទៃ និងនគរបាលខេត្តព្រះសីហនុ បានស្រាវជ្រាវរហូតឈានដល់ការឃាត់ខ្លួនកូនប្រុសដែលចាក់សម្លាប់ ឪពុកខ្លួនឯងកាលពីថ្ងៃទី២៥ ខែឧសភា នៅភូមិចាន់ហៀរ ឃុំបឹងមាលា ស្រុកស្វាយលើ ខេត្តសៀមរាប។
លោកបន្តថាលោកកំពុងធ្វើដំណើរទៅយកជនសង្ស័យដែលចាក់សម្លាប់ឪពុកខ្លូនឯង ដែលកម្លាំងនគរបាលសហការគ្នាចាប់បាននៅខេត្តព្រះសីហនុ ខណៈជនសង្ស័យកំពុងលាក់ខ្លួនធ្វើការសំណង់។
សូមរម្លឹកថាៈ ជនរងគ្រោះឈ្មោះ សុខ ប៉ក់ ភេទប្រុស អាយុ៥៩ឆ្នាំ មុខរបរកសិករនៅភូមិចាន់ហៀរ ឃុំបឹងមាលា ស្រុកស្វាយលើ ខេត្តសៀមរាប បង្កឡើងដោយជនសង្ស័យជាកូនបង្កើត ឈ្មោះ ប៉ក់ ផាន់ ភេទប្រុស អាយុ១៧ឆ្នាំ មុខរបរកសិកររស់នៅភូមិឃុំខាងលើ។
កាលពីនៅព្រឹកថ្ងៃទី២៥ ខែឧសភា ឆ្នាំ២០១៨ ជនរងគ្រោះមានជម្លោះពាក្យសំដីជាមួយជនសង្ស័យអំពីរឿងជនសង្ស័យមិនជួយធ្វើការងារផ្ទះដើរតែផឹកពេលចូលផ្ទះម្តងៗសុំតែលុយក៏កើតរឿងឈ្លោះគ្នាជនសង្ស័យដើរចេញពីផ្ទះបាត់លុះដល់ល្ងាចថ្ងៃដដែលជនសង្ស័យបានត្រឡប់ចូលផ្ទះវិញដោយមានសភាពស្រវឹងពេលនោះជនសង្ស័យ និងជនរងគ្រោះក៏មានការឈ្លោះប្រកែកគ្នាបន្តទៀត ដោយជនរងគ្រោះនិយាយដដែលៗអំពីរឿងជនសង្ស័យដើរផឹកទើបជនសង្ស័យខឹងក៏បានយកកាំបិតផ្លែដែកដងឈើចាក់មកលើជនរងគ្រោះត្រូវចំគល់ដោះខាងស្តាំបណ្តាលឲ្យស្លាប់តែម្តង។
តាមការបំភ្លឺពីឈ្មោះ សួន លាំ អាយុ៥៧ឆ្នាំ ជាប្រពន្ធជនរងគ្រោះ និងជាម្តាយជនសង្ស័យបានបំភ្លឺទាំងមិនអស់សេចក្តីថាប្តីរបស់គាត់ និងកូនពិតជាមានជម្លោះ និងគ្នាមែនអំពីរឿងកូនដើរផឹក និងកូនសុំលុយទៅធ្វើប៉ាស់ស្ព័រទៅប្រទេសថៃប៉ុន្តែប្តីរបស់គាត់មិនឲ្យលុយទើបទាស់គ្នានៅពេលកើតហេតុនេះគាត់កំពុងដាំបាយនៅក្នុងផ្ទះលឺសំលេងកូន និងប្តីទាស់គ្នានៅខាងលិចផ្ទះមួយសន្ទុះក្រោយមកឃើញប្តីដេកដួលក្រោយផ្ទះដោយមានឈាមប្រឡាក់ពេញខ្លួនចំណែកកូនជិះម៉ូតូចេញទៅបាត់មិនដឹងមូលហេតុ ទើបគាត់ស្រែកប្រាប់គេឲ្យជួយប៉ុន្តែប្តីបានស្លាប់បាត់ហើយ។
តាមការបំភ្លឺពីឈ្មោះហ៊ាង ធឿន អាយុ១០ឆ្នាំ ត្រូវជាចៅជនរងគ្រោះស្នាក់នៅផ្ទះជាមួយបានបំភ្លឺថា រូបគេត្រូវបានយាយ(សួន លាំ)ប្រើដាំបាយនៅក្បែរផ្ទះចំណែកតា(សុខ ប៉ក់)គាត់បោសសំរាមមុខផ្ទះពេលនោះមារបស់គេ ប៉ក់ ផាន់ មិនដឹងមកពីផឹកស្រាឯណាទេ ពេលមកដល់គាត់ឈ្លោះគ្នាជាមួយតាប៉ក់ តាប៉ក់បានស្តីឲ្យថាដើរតែផឹកមិនគិតការងារផ្ទះទេ មា ផាន់តបវិញថាកុំរអ៊ូពេក ខ្ញុំធំខ្ញុំដឹងហើយ ពួកគាត់ឈ្លោះគ្នាទៅមក តា ប៉ក់ ក៏និយាយថា អាហែងចូលមកអញមិនខ្លាចងាប់ទេ លឺដូចនេះមា ផាន់ក៏ឡើងទៅយកកាំបិតនៅលើជង្រុកស្រូវដើរសំដៅទៅតា ប៉ក់ ពេលនោះដែរ យាយ លាំ បានចូលទៅឃាត់ ប៉ុន្តែឃាត់ មា ផាន់មិនឈ្នះ មាផាន់ក៏យកកាំបិតនោះចាក់ទៅលើតា ប៉ក់ ត្រូវចំដើមទ្រូងដួលដេកដីចេញឈាម នៅក្បែររបងមុខផ្ទះពេលនោះខ្ញុំខ្លាចបានរត់មកខាងកើតផ្ទះ មិនដឹង មា ផាន់យកកាំបិតទៅទុកឯណាទេ បន្ទាប់មក យាយលាំ និងមា ផាន់បានអូស តា ប៉ក់មកក្រោយផ្ទះ ហើយមា ផាន់បានជិះម៉ូតូចេញពីផ្ទះទៅលិច ចំណែកយាយលាំឲ្យខ្ញុំរត់ទៅប្រាប់តាយ៉យឲ្យមកជួយមើលតាផាន់ហើយខ្ញុំក៏បានដេកនៅផ្ទះតាយ៉យ។
ដោយផ្អែកលើការបំភ្លឺ និងវត្ថុតាង(កាំបិត)ចាប់យកបាននៅកន្លែងកើតហេតុគឺពិតជាជាជនសង្សយ័បានប្រព្រឹត្តលើជនរងគ្រោះពិតប្រាកដមែន ៕ ប៊ុនរិទ្ធី
