សារព័ត៌មាន នគរវត្ត តែងតែនាំមុខគេជានិច្ច
ខេត្តសៀមរាប៖ ការតែងតាំងប្រធានមន្ទីរប្រៃសណីយ៍ និងទូរគមនាគមន៍ ខេត្តសៀមរាប ថ្មី នាពេលខាងមុខ ហាក់មានភាពមិនប្រក្រតីក្នុងមុខដំណែងដ៏ធំមួយនេះ ហើយករណីនេះ បានធ្វើឲ្យមហាជនរិះគន់យ៉ាងចាស់ដៃថា ជារឿងបក្ខពួកនិយម អាចនាំឲ្យមានអំពើពុករលូយ។
ប្រភព បានបង្ហើបឲ្យដឹងថា ការតែងតាំងប្រធានមន្ទីរប្រៃសណីយ៍ និងទូរគមនាគន៍ ខេត្តសៀមរាប ថ្មីនេះដោយសារប្រធានមន្ទីរចាស់ បានចូលនិវត្តន៍ កាលពីខែមីនា កន្លងទៅនេះ ឥឡូវសមាសភាពប្រធានមន្ទីរថ្មី ត្រូវគេទម្លាយពីគំគ្រោងនឹងតែងតាំងប្រធានការិយាល័យ ដែលទើបចូលថ្មីឈ្មោះ សុខ សីហា ជាមន្ត្រីដែលផ្ទេរក្របខណ្ឌពីគ្រូបង្រៀន នៅសាលាបឋមសិក្សាវត្តបូព៌ កាលពីឆ្នាំ២០១៤ ក្នុងតួនាទីជាមន្ត្រីក្រមការ លុះមួយរយៈមក លោកក៏ត្រូវបានគេតែងតាំងជាប្រធានការិយាល័យនៅឆ្នាំ២០១៦។
ប្រភពបានបន្ថែមថា ក្នុងតួនាទីជាប្រធានការិយាល័យ ក្រោមការជ្រោមជ្រែងរបស់លោក ហុង ប៊ុនធ្វី ដែលនៅជាប្រធានចាស់នោះ លោក សុខ សីហា បានបំពេញការងារមិនជាជាប់លាប់នោះទេ ដោយម្តងឃើញ ម្តងបាត់ ព្រោះតែលោកជាប់បំពេញការងារផ្ទាល់ខ្លួនរបស់លោក ពោលគឺលោកជាមគ្គុទេសទេសចរណ៍ផងដែរ។ តែនៅពេលដែលលោក ហុង ប៊ុនធ្វី ចូលនិវត្តន៍នៅដើមឆ្នាំ២០១៨នេះ ស្រាប់តែលេចលឺព័ត៌មានមកថា លោកប្រធានមន្ទីរចាស់ បានស្នើទៅអភិបាលខេត្តសៀមរាប ដើម្បីដាក់លោក សុខ សីហា ឲ្យមកកាន់តំណែងជាប្រធានជំនួសលោក ដែលវាបានធ្វើឲ្យមន្ត្រីរាជការក្នុងមន្ទីរប្រៃសណីយ៍ និងទូរគមនាគមន៍ខេត្តសៀមរាប មួយចំនួន មិនពេញចិត្ត ដោយពួកគេគិតថា ការឡើងតំណែងដ៏លឿននេះ គឺបានមកពីលុយកាក់ និងខ្សែបក្ខពួក។
លោក ហុង ប៊ុនធ្វី បានថ្លែងថា ចំពោះសំណើរឲ្យមានការតែងតាំងលោក សុខ សីហា កាន់តំណែងជាប្រធានមន្ទីរប្រៃសណីយ៍ និងទូរគមនាគមន៍នេះ លោកមិនបានដឹងពីរឿងនេះទេ វាគឺជាការចាត់ចែងរបស់រដ្ឋបាលខេត្ត ហើយបើតាមលោកដឹង សំណើរនោះ គឺនឹងត្រូវសម្រេចដោយក្រសួង។
ដោយឡែកលោក លីវ គីមហេង ប្រធាននាយកដ្ឋានបុគ្គលិក នៃក្រសួងប្រៃសណីយ៍ និងទូរគមនាគមន៍ បានមានប្រសាសន៍ថា លោក សុខ សីហា ពិតជាត្រូវបានក្រសួង សម្រេចឲ្យធ្វើជាប្រធានមន្ទីរប្រៃសណីយ៍ និងទូរគមនាគមន៍ តាមសំណើររបស់សាលាខេត្តសៀមរាប ហើយក្រសួង គ្រោងនឹងប្រកាសនៅពេលសមស្របណាមួយ។
ទោះជាយ៉ាងណាក៏ដោយ បើសិនជាលោក សុខ សីហា ដែលឡើងតួនាទីដូចផ្លេកបន្ទោ ត្រូវបានគេតែងតាំងជាប្រធានមន្ទីរប្រៃសណីយ៍ និងទូរគមនាគមន៍ ខេត្តសៀមរាប មែន ច្បាស់ជាធ្វើឲ្យមន្ត្រីរាជការមួយចំនួនធំ នៅក្នុងមន្ទីរនេះ មិនសប្បាយចិត្តឡើយ ដែលពួកគាត់គិតថា មិនបាច់ប្រឹងធ្វើការអ្វីទេ គឺចាំតែអែបមេ និងចេះសែនទៅ ជាការស្រេចហើយ។
គួរបញ្ជាក់ដែរថា កាលពីដើមខែឧសភានេះ សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានប្រកាសថា សម្តេចនឹងពិនិត្យឡើងវិញ នូវការដំឡើងឋានន្តរស័ក្តិ និងថ្នាក់ដឹកនាំនៅក្នុងក្រសួង មន្ទីរ ស្ថាប័នទាំងអស់ថា តើបានដំឡើងឲ្យមន្ត្រី និងកងកម្លាំងក្នុងក្រសួងរបស់ខ្លួន បានត្រឹមត្រូវទៅតាមការកំណត់ក្នុងច្បាប់ហើយ ឬនៅ។
ជាមួយគ្នានោះ សម្តេចក៏បានស្នើដល់រដ្ឋមន្ត្រី ដែលគ្រប់គ្រងក្រសួងទាំងអស់ ត្រូវយកចិត្តទកដាក់លើរឿងនេះ គឺត្រូវដំឡើងឋានន្តរស័ក្តិឲ្យបានត្រឹមត្រូវទៅតាមច្បាប់ កុំធ្វើតាមតែបទបញ្ជា ហើយកុំគិតតែដំឡើងឋានន្តរស័ក្តិ និងតួនាទីរបស់ខ្លួន ឬបក្ខពួកខ្លួន មិនបានគិតដល់មន្ត្រីនៅក្រោមឱវាទ ដោយតាមច្បាប់ នៅក្នុងក្របខណ្ឌមន្ត្រីរាជការស៊ីវិល គឺក្រោយរយៈពេល ២ឆ្នាំ ទើបត្រូវស្នើសុំតម្លើងឋានន្តរស័ក្តិចំនួន ១ដង។
មហាជន បានធ្វើការកត់សម្គាល់ថា មួយរយៈចុងក្រោយនេះ ការតែងតាំងមន្ត្រីរាជការមួយចំនួន ហាក់មានភាពមិនប្រក្រតី គឺខ្លះជាមន្ត្រីលោតផ្លោះតែម្តង សង្ស័យតែគាត់ អាងមានខ្សែធំ និងមានទឹកប្រាក់សំរាប់យឺតយោង៕ ប៊ុនរិទ្ធី
