សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ អំណោយមនុស្សធម៌របស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានផ្តល់ជូនដល់ប្រជាពលរដ្ឋក្រីក្រ ខ្វះខាត ចាស់ជរា ពិការ និងអ្នកផ្ទុកមេរោគអេដស៍ សរុបចំនួន ១២៥គ្រួសារ តាមរយៈអនុសាខាកាកបាទក្រហមកម្ពុជាខណ្ឌដូនពេញ ។
ពិធីនេះដែរ បានធ្វើឡើងនៅព្រឹកថ្ងៃ ពុធ ៨រោច ខែជេស្ឋ ឆ្នាំច សំរិទ្ធស័ក ពុទ្ធសករាជ២៥៦២ ត្រូវនឹងថ្ងៃទី០៧ ខែមិថុនា ឆ្នាំ ២០១៨ វេលាម៉ោង៨និង០០នាទី ក្រោមអធិបតីភាព លោក សុខ ពេញវុធ ប្រធានកិត្តិយសអនុសាខាកាកបាទក្រហមកម្ពុជាខណ្ឌដូនពេញ និងមានការអញ្ជើញចូលរួមពី លោក ប្រធានអនុសាខាកាកបាទក្រហមខណ្ឌ លោក លោកស្រីអនុប្រធាន សមាជិក សមាជិកា អ្នកស្ម័គ្រចិត្តកាកបាទក្រហម បានអញ្ជើញជាអធិបតីភាពក្នុងពិធីចែកអំណោយមនុស្សធម៌របស់កាកបាទក្រហមកម្ពុជា ជូនដល់ប្រជាពលរដ្ឋក្រីក្រ ខ្វះខាត ចាស់ជរា ពិការ និងអ្នកផ្ទុកមេរោគអេដស៍ សរុបចំនួន ១២៥គ្រួសារ មកពីសង្កាត់ចំនួន៦ រួមមាន៖ សង្កាត់ស្រះចក, វត្តភ្នំ, ផ្សារចាស់, ផ្សារកណ្តាលទី១, ផ្សារកណ្តាលទី២ និងសង្កាត់ជ័យជំនះ ខណ្ឌដូនពេញ ។
អំណោយដែលបងប្អូនប្រជាពលរដ្ឋ ទទួលបាននាពេលនេះរួមាន៖ អង្ករ ចំនួន ០១បាវ ស្មើនឹង ៣០គីឡូក្រាម ; ទឹកត្រី ចំនួន ០១យួរ ; ថវិកា ចំនួន ២០,០០០រៀល ;សរុបថវិកាចំនួន ២,៥០០,០០០រៀល អង្ករចំនួន៣,៧៥០គីឡូក្រាម និងទឹកត្រីចំនួន ១២៥យួរ ។
ក្រៅពីនេះអនុសាខាកាកបាទក្រហមកម្ពុជាខណ្ឌដូនពេញ ក៏បានទទួលថវិកាជួយឧបត្ថម្ភមួយចំនួនពីសប្បុរសជនរួមមាន៖-លោកស្រី ប៉ុន ដានី ថវិកាចំនួន ២០០,០០០រៀល ; លោក សុខ គឹមហេង ថវិកាចំនួន ១០០,០០០រៀល ៕ស តារា
