សារព័ត៌មាន នគរវត្ត តែងតែនាំមុខគេជានិច្ច
ខេត្តឧត្ដរមានជ័យ: ប្រជាពលរដ្ឋបានលើកឡើងថា បច្ចុប្បន្នឈ្មួញឈ្មោះ ម៉ៅ សារ៉េត នៅតែអាចធ្វើសកម្មភាពដឹកជញ្ជូនឈើកែច្នៃរួចជាគ្រោងទ្វារបង្អួចចេញពីស្រុកត្រពាំងប្រាសាទ និងស្រុកអន្លង់វែង យ៉ាងអនាធិបតេយ្យហើយគ្មានមន្ត្រីជំនាញឬសមត្ថកិច្ចពាក់ព័ន្ធណាចាត់វិធានការបង្ក្រាបឡើយ ។
ប្រជាពលរដ្ឋសង្ស័យថា មន្ត្រីរដ្ឋបាលព្រៃឈើក្នុងស្រុកអន្លង់វែង និងស្រុកត្រពាំងប្រាសាទ ក៏ដូចជាសមត្ថកិច្ចពាក់ព័ន្ធ ទទួលបានផលប្រយោជន៍ពីឈ្មួញឈ្មោះ ម៉ៅ សារ៉េត ជាប្រចាំទើបបណ្ដោយឲ្យឈ្មួញម្នាក់នេះធ្វើអ្វីៗតាមអំពើចិត្ត ។ ប្រសិនបើមន្ត្រីរដ្ឋបាលព្រៃឈើ និងសមត្ថកិច្ចពាក់ព័ន្ធមិនឃុបឃិតទេនោះ គឺឈ្មួញឈ្មោះ ម៉ៅ សារ៉េត មិនអាចដឹកជញ្ជូនឈើកែច្នៃជាគ្រោងទ្វារបង្អួចចេញពីទឹកដីស្រុកអន្លង់វែង និងស្រុកត្រពាំងប្រាសាទ ខេត្តឧត្ដរមានជ័យ បានឡើយ ។
ថ្មីៗកន្លងទៅនេះគឺកាលពីយប់ថ្ងៃទី០៧ ខែមិថុនា ឆ្នាំ២០១៨ មានរថយន្តដឹកឈើគ្រោងទ្វារបង្អួចរបស់ឈ្មួញឈ្មោះ ម៉ៅ សារ៉េត ចំនួន៤គ្រឿងចាកចេញពីចំណុចផ្ទះរបស់ឈ្មួញរូបនេះនៅក្នុងស្រុកត្រពាំងប្រាសាទ ហើយឆ្លងកាត់ស្រុកអន្លង់វែង ឆ្ពោះទៅតាមខេត្តបន្ទាយមានជ័យ និងបណ្ដាខេត្តផ្សេងៗយ៉ាងរលូន ។ លោក អ៊ឹម សាវរិទ្ធ នាយខណ្ឌរដ្ឋបាលព្រៃឈើខេត្តឧត្ដរមានជ័យ និងមន្ត្រីក្រោមឱវាទធ្វើមិនដឹងមិនឮអ្វីទាំងអស់ ហើយបណ្ដោយឲ្យឈ្មួញឈ្មោះ ម៉ៅ សារ៉េត ក៏ដូចជាឈ្មួញដទៃទៀតបន្តសកម្មភាពដឹកជញ្ជូនឈើចេញពីស្រុកត្រពាំងប្រាសាទ និងស្រុកអន្លង់វែង យ៉ាងគគ្រឹកគគ្រេង ។ សូម្បីតែលោក ស ថាវី អភិបាលខេត្តឧត្ដរមានជ័យ ក៏រក្សាភាពស្ងៀមស្ងាត់ដែរ ក្នុងខណៈដែលឈ្មួញឈ្មោះ ម៉ៅ សារ៉េត និងឈ្មួញដទៃទៀតបន្តសកម្មភាពកាប់ឈើ និងដឹកជញ្ជូនឈើចេញពីស្រុកអន្លង់វែង និងស្រុកត្រពាំងប្រាសាទ ដោយគ្មានញញើតអ្វីទាំងអស់ ។
សេចក្ដីរាយការណ៍ពីប្រជាពលរដ្ឋនៅក្នុងស្រុកអន្លង់វែង និងស្រុកត្រពាំងប្រាសាទ បានឲ្យដឹងថា មិនមែនតែឈ្មួញឈ្មោះ ម៉ៅ សារ៉េត ទេដែលកំពុងធ្វើសកម្មភាពដឹកជញ្ជូនឈើកែច្នៃរួចជាគ្រោងទ្វារបង្អួចចេញពីស្រុកត្រពាំងប្រាសាទ និងស្រុកអន្លង់វែង យ៉ាងគឃ្លើន ។ ប្រភពបានឲ្យដឹងទៀតថា ឈ្មួញធំៗ២នាក់ទៀតគឺឈ្មោះ ឆាយ និងឈ្មោះ រិទ្ធ ក៏បន្តសកម្មភាពដឹកជញ្ជូនឈើប្រភេទលេខ១ ប្រភេទលេខ២ តាមរថយន្តធុនធំចំណុះរាប់សិបតោនចេញពីខេត្តឧត្ដរមានជ័យ ចូលមកខេត្តបន្ទាយមានជ័យ និងខេត្តសៀមរាប ដោយគ្មានមន្ត្រីរដ្ឋបាលព្រៃឈើឬសមត្ថកិច្ចពាក់ព័ន្ធណាចាត់វិធានការបង្ក្រាបឡើយ ។ ផ្ទុយទៅវិញប្រភពខ្លះបានរិះគន់ថា លោក អ៊ឹម សាវរិទ្ធ នាយខណ្ឌរដ្ឋបាលព្រៃឈើខេត្តឧត្ដរមានជ័យ និងបក្ខពួកបានចាត់ទុកបទល្មើសព្រៃឈើគឺជាប្រភពចំណូលរបស់ខ្លួន ហេតុនេះហើយទើបគេបណ្ដោយឲ្យឈ្មួញច្រើននាក់បន្តសកម្មភាពដឹកជញ្ជូនឈើខុសច្បាប់ចេញពីស្រុកត្រពាំងប្រាសាទ និងស្រុកអន្លង់វែង យ៉ាងពេញបន្ទុកតែម្តង៕ ប៉ែន នួន
