សារព័ត៌មាន នគរវត្ត តែងតែនាំមុខគេជានិច្ច
ខេត្តសៀមរាប៖ តារាសម្តែងស្រីតូចច្រឡឹង ពេជ្រ ខេនឌី ដែលធ្លាប់បានប្រកាសបើកមុខជំនួញធំដុំនៅខេត្តសៀមរាបកន្លងមក បានចេញមុខចោទប្រកាន់បុគ្គលិកក្រុមហ៊ុនសន្តិសុខ CSN គាស់សោទ្វារ ចូលលួចទ្រព្យក្នុងហាងនាងតម្លៃជាង២ម៉ឺនដុល្លារ ។
ការចោទប្រកាន់នេះបានធ្វើឡើងក្រោយពីភាគីក្រុមហ៊ុនសន្តិសុខបានលើកឡើងថា តារាស្រីរូបនេះខកខានក្នុងការបង់ប្រាក់ថ្លៃសេវាជួលសន្តិសុខចំនួន៦៤០ដុល្លារ ។
ពេជ្រ ខេនឌី បានរៀបរាប់អំពីដំណើរ រឿងកើតហេតុខាងលើថា ដើមឡើយនាងបានចូលហ៊ុនជាមួយមិត្តភក្តិ បើកដំណើរការភោជនីយដ្ឋានយីហោ“ល្បុកកត្តោក្លិប” នៅលើទឹកដីនៃខេត្តសៀមរាប ប៉ុន្តែដោយសារមានបញ្ហាជាមួយម្ចាស់ភាគហ៊ុននាងបានសម្រេចចិត្តផ្អាកដំណើរការ និងចែកភាគហ៊ុនគ្នាវិញ ។
នាងបន្តថា ការចែកភាគហ៊ុននោះភាគីម្ខាងទៀតជាអ្នកទទួលរ៉ាប់រងក្នុងការបង់ថ្លៃសេវាសន្តិសុខ ប៉ុន្តែម្ចាស់ភាគហ៊ុននោះមិនបានបង់ឡើយ ហើយនាងក៏មិនបានទទួលដំណឹងនេះទេ ស្រាប់តែសន្តិសុខក្រុមហ៊ុនខាងលើបានគាស់ទ្វារ ប្រមូលទ្រព្យសម្បត្តិជាគ្រឿងភ្លេងយកទៅទុកនៅក្រុមហ៊ុនខ្លួន ហើយ មិនទទួលយកការដោះស្រាយ ។
នាងបន្តថា ដើមឡើយនាងគិតថា ក្រុមហ៊ុនសន្តិសុខខាងលើបានប្រមូលទ្រព្យសម្បត្តិនាងដើម្បីការពារនិងរក្សាទុកឲ្យស្រាប់តែក្រុមហ៊ុននេះបែជារឹបអូសទ្រព្យសម្បត្តិរបស់នាងនទៅវិញ ។
នាងថាថ្លៃសេវាជួលនោះនាងសុខចិត្តចេញមុខសង ប៉ុន្តែក្រុមហ៊ុនមិនបានដោះស្រាយជូនថែមទាំងជំរុញឲ្យនាងប្តឹងទៀតផងដែលធ្វើឲ្យនាងកាន់តែហួសចិត្ត។
នាងថាជាអំពើមួយខុសទៅនឹងច្បាប់ព្រោះតែការគាស់ទ្វារមិនបានជូនដំណឹងទៅដល់នាង ឬមន្ត្រីមូលដ្ឋាន ហើយនាងបានស្នើដល់មន្ត្រីមូលដ្ឋានជួយពិនិត្យ និងស្វែងរកយុត្តិធម៌ចំពោះនាងផងដែរ ។ នាងព្រមានទៅកាន់ក្រុមហ៊ុនសន្តិសុខ CSN ឲ្យសងសម្ភារៈដែលបាត់បង់ទាំងប៉ុន្មានឲ្យគ្រប់ចំនួនមុនពេលដែលនាងសម្រេចចិត្ត ចំណាត់ការតាមផ្លូវច្បាប់នោះ ។
នាងថា នាងពិតជាមិនអាចទទួលយកបានសម្តីមាក់ងាយរបស់ក្រុមហ៊ុន រួមទាំងការប្រព្រឹត្តិទង្វើដូចចោរគាស់កកាយប្រមូលទ្រព្យសម្បត្តិហាងរបស់នាង ។
នាងប្រកាសដែរថា នេះ ជាទង្វើដែលមិនមានការទទួលខុសត្រូវសម្រាប់អតិថិជនពីសំណាក់ក្រុមហ៊ុនសន្តិសុខ ហើយបែជាលួចទ្រព្យសម្បត្តិ និងបង្កជម្លោះជាពាក្យសម្តីដល់នាងជាអតិថិជន។ នាងក៏បានផ្តាំផ្ញើឲ្យមហាជនមានការប្រុងប្រយ័ត្ន ចំពោះការជួលសេវាកម្មសន្តិសុខសម្រាប់ការពារទ្រព្យរបស់ខ្លួននោះ៕ វឌ្ឍនា
