សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់បើករថយន្តមួយគ្រឿង បោះពួយយ៉ាងលឿនជ្រុលទៅបុករថយន្តមួយគ្រឿងទៀត បណ្តាលឲ្យរថយន្តមួយគ្រឿងជ្រុលទៅបុករបាំងថ្មពុះចែកទ្រូងផ្លូវ និងមួយគ្រឿងទៀតជ្រុលទៅបុកទ្វារផ្ទះរបស់ប្រជាពលរដ្ឋ រងការខូចខាតទាំងសងខាង។
ហេតុការណ៍នេះបង្កឲ្យមានការណ៍ភ្ញាក់ផ្អើលឡើងកាលពីម៉ោងជិត១២យប់ ថ្ងៃសុក្រ ៣កើត ខែបឋមាសាឍ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី១៥ ខែមិថុនា ឆ្នាំ២០១៨ នៅតាមបណ្ដោយផ្លូវ២៧១ កែងនិងផ្លូវបេតុង ក្បែរវិទ្យាល័យជាស៊ីមសាមគ្គី ស្ថិតក្នុងសង្កាត់បឹងសាឡាង ខណ្ឌទួលគោក រាជធានីភ្នំពេញ។
ប្រភពព័ត៌មាននៅកន្លែងកើតហេតុបានឲ្យដឹងថា នៅមុនពេលកើតហេតុ គេឃើញបុរស២នាក់បើកបររថយន្តមួយគ្រឿងម៉ាកតូយ៉ូតា កាមរីបាឡែន ពណ៌ស្ករ ពាក់ស្លាក់លេខ ភ្នំពេញ 2AC-3067 ដោយធ្វើដំណើរតាមបណ្ដោយផ្លូវបេតុង ចេញពីខាងក្រោយវិទ្យាល័យជាស៊ីមសាមគ្គីឆ្ពោះ ទៅផ្លូវ២៧១ ខណៈមកដល់ចំណុចកើតហេតុរថយន្ដក៏បានបត់រថយន្តទៅស្ដាំចូលផ្លូវ២៧១ បំណងឆ្ពោះទៅស្តុបណូគារ ពេលនេះស្រាប់តែមានរថយន្តបង្កមួយគ្រឿងទៀតម៉ាក កាមរីបាឡែន ពណ៌ទឹកប្រាក់ ពាក់ស្លាកលេខ ភ្នំពេញ2AQ-0180 ដែលបើកបរដោយបុរសម្នាក់ទំនងជាស្រវឹងស្រា បានបើកតាមបណ្ដោយផ្លូវ២៧១ ដោយបើកមកពីខាងស្ពានអាកាសស្ទឹងមានជ័យឆ្ពោះទៅស្តុបណូគារ ក្នុងល្បឿនយ៉ាងលឿន រួចក៏ជ្រុលចង្កូតទៅបុករថយន្តរងគ្រោះខាងលើចំកង់ខាងមុខចំហៀងខាងឆ្វេងបណ្តាលឲ្យរថយន្តរងគ្រោះជ្រុលចង្កូតទៅបុកទ្វារផ្ទះរបស់ប្រជាពលរដ្ឋ។ រីឯរថយន្តរងគ្រោះរងការខូចខាតដាច់ក្រឡេកង់ខាងមុខចំហៀងខាងឆ្វេង ដោយឡែករថយន្តបង្កបានជ្រុលចង្កូតទៅខាងឆ្វេងទៅបុកនិងរបាំងថ្មពុះចែកទ្រូងផ្លូវបាក់វាចអស់២កង់។ ចំណែកឯរថយន្តរងការខូចខាតកំពិតកាងនិងដាច់ក្រឡេកង់ខាងមុខទាំងសងខាងទៅមុខលែងរួច ។
ក្រោយពេលកើតហេតុសមត្ថកិច្ចមូលដ្ឋានបានចុះមកដល់ចំណុចកើតហេតុទាក់ទងទៅសមត្ថកិច្ចជំនាញឲ្យចុះមកវាស់វែងស្ទួចយករថយន្តទាំង២គ្រឿងទៅរក្សាទុកនៅការិយាល័យចរាចរផ្លូវគោកនៃស្នងការដ្ឋាននគរបាលរាជធានីភ្នំពេញ រង់ចាំដោះស្រាយគ្នាទៅតាមផ្លូវច្បាប់នៅពេលក្រោយ ៕ ជ្រោយពេជ្រ
