ម៉ូតូបុកគោយន្តកន្រ្តៃ ស្លាប់ម្នាក់ របួសធ្ងន់ម្នាក់ ក្រោយចេញពីច្រៀងខារ៉ាអូខេ

ខេត្តកំពង់ឆ្នាំង: មានឧប្បត្តិហេតុគ្រោះថ្នាក់ចរាចរណ៍មួយបានកើតឡើងដោយម៉ូតូបុកជាមួយ គោយន្តកន្ត្រៃ ដែលបើកបរច្រាសទិសគ្នា បណ្តាលឲ្យបុរសម្នាក់ស្លាប់នៅនឹងកន្លែង និងម្នាក់ទៀតរបួសធ្ងន់ កាលពីវេលាម៉ោង៨និង១០នាទីយប់ ថ្ងៃ សុក្រ ៣ កើត ខែ បឋមាសាឍ ឆ្នាំ ច សំរឹទ្ធិស័ក ព.ស. ២៥៦២ ត្រូវនឹង ថ្ងៃទី១៥ ខែមិថុនា ឆ្នាំ២០១៨ លើផ្លូវលំ ភូមិចាមចាស់ ឃុំឈើតុំ ស្រុកក្រគរ ខេត្តពោធិ៍សាត់ ។

សមត្ថកិច្ចបានឲ្យដឹងថាករណីនេះកើតឡើងរវាងម៉ូតូម៉ាកហុងដា សេ១២៥ ស៊េរី២០១៧ ពណ៌ខ្មៅ គ្មានស្លាកលេខ បើកបរដោយឈ្មោះ ផែន រ៉ា អាយុ៣៨ឆ្នាំ ភេទប្រុស ស្នាក់នៅភូមិអូររំចេក ឃុំចក ស្រុកបរិបូរ ខេត្តកំពង់ឆ្នាំង រួមដំណើរជាមួយបុរសម្នាក់ទៀតជិះពីក្រោយ ។បុរសនេះ បើកបរម៉ូតូពីកើតទៅទិសលិច ហើយពេលមកដល់ចំណុចកើតហេតុខាងលើ បានបុកគោយន្តកន្ត្រៃចំពីមុខខណៈយានយន្តទាំងពីរគ្រឿង

កំពុងធ្វើដំណើរច្រាសទិសគ្នាពីលិចទៅទិសខាងកើត ពីកើតមកលិច បណ្ដាលឲ្យស្លាប់នៅនឹងកន្លែងកើតហេតុតែម្តង។ ចំណែកអ្នក រួមដំណើរម្នាក់ទៀតរងរបួសធ្ងន់ ត្រូវបានបញ្ជូនទៅមន្ទីរពេទ្យ។

ក្រោយពេលកើតហេតុ អ្នបើកគោយន្តបានបើករត់គេច តែត្រូវបានសមត្ថកិច្ចប៉ុស្តិ៍នគរបាលរដ្ឋបាលក្តុលសែនជ័យ ស្រុកទឹកផុស ខេត្តកំពង់ឆ្នាំង តាមឃាត់គោយន្តនោះបានតែម្ចាស់រត់គេចខ្លួនបាត់។ ចំណែកសាកសពជនរងគ្រោះ ត្រូវបានប្រគល់ជូនក្រុមគ្រួសារយកទៅធ្វើបុណ្យតាមប្រពៃណី។

រីឯមូលហេតុ បើកបរស្ថិតក្នុងស្ថានភាពស្រវឹង ផឹកស៊ីច្រៀងរាំសប្បាយនៅហាងខារ៉ាអូខេ ពេចជោរ ឃុំក្តុល ស្រុកទឹកផុស ហើយជិះម៉ូតូត្រឡប់មកផ្ទះវិញ។ នេះបើតាមការឲ្យដឹងពីអ្នករងរបួសធ្ងន់ ៕ ចន្ថា