សារព័ត៌មាន នគរវត្ត តែងតែនាំមុខគេជានិច្ច
ប៉ោយប៉ែត ៖ តាមសេចក្តីរាយការណ៍ពីស្រុកអូជ្រៅឲ្យដឹងថា រថយន្តហាយឡេនដឺមួយគ្រឿង កំពុងបើកចូលស្ថានីយសុខៗ ស្រាប់តែឆាបឆេះបង្កជាអណ្តាតភ្លើងផ្អើលពេញលើផ្លូវជាតិលេខ៥ កាលពីម៉ោង៩និង៤០នាទីព្រឹក ថ្ងៃអាទិត្យ ៥កើត ខែបឋមាសាឍ ឆ្នាំច សំរឹទ្ធិស័ក ព.ស. ២៥៦២ ត្រូវនឹងថ្ងៃទី១៧ ខែមិថុនា ឆ្នាំ២០១៨ ជិតស្ថានីយបញ្ចូលហ្គាសមួយកន្លែង ស្ថិតក្នុងភូមិថ្មី ឃុំសំរោង ស្រុកអូរជ្រៅខេត្តបន្ទាយមានជ័យ ។
សមត្ថកិច្ចស្រុកអូរជ្រៅបន្តថា រថយន្តខាងលើម៉ាក HILANDER ពាក់ស្លាកលេខ ភ្នំពេញ 2AK-6805 ពណ៌ខ្មៅ ជារថយន្តប្រើហ្គាស បើកបរដោយឈ្មោះ បឿយ បៀ ភេទប្រុស អាយុ30ឆ្នាំ និងប្រពន្ធឈ្មោះចាន់ ដារី អាយុ៣០ឆ្នាំ អ្នកទាំង២មានទីលំនៅភូមិអូរអំបិល សង្កាត់អូរអំបិល ក្រុងសិរីសោភណ្ឌ ។
លោក សេស វិបុល អធិការនគរបាលស្រុកបានប្រាប់តាមទូរស័ព្ទថា មុនកើតហេតុ មានរថយន្តមួយគ្រឿងជិះគ្នា២នាក់ប្តីប្រពន្ធបើកពីកើតមកលិចបំណងទៅប៉ោយប៉ែត ហើយមកដល់កន្លែងកើតហេតុបំរុងបត់ចូលស្ថានីយ ដើម្បីបញ្ចូលហ្គាស តែមិនទាន់បានទាំងបត់ចូលផង ស្រាប់តែអណ្តាតភ្លើងឆាបឆេះពីក្រោយដេញមកខាងមុខធ្វើឱ្យម្ចាស់រថយន្ត២នាក់ប្តីប្រពន្ធនិងម្ចាស់ស្ថានីយ៏ភយ័ព្រលឹងចុងសក់ ព្រោះកន្លែងកើតហេតុនៅជិតស្ថានីយរបស់គាត់។ ប៉ុន្តែករណីខាងលើនេះមិនបានបង្កឲ្យនរណាម្នាក់រងរបួសនិងស្លាប់ឡើយ គឺអ្នកបើកបរ និងប្រពន្ធបានចេញពីរថយន្តទាន់ពេលវេលា ។
លោកអធិការបញ្ជាក់ថាក្រោយទទួលបានដំណឹងនេះភ្លាម កម្លាំងលោកក៏បានចុះទៅកន្លែងកើតហេតុ ហើយលោក អាត់ ខែម ស្នងការនគរបាលខេត្តក៏បានបញ្ជូនរថយន្តពន្លត់អគ្គិភ័យទៅកន្លែងកើតហេតុ ដើម្បីជួយផងដែរ តែរថយន្តត្រូវបានឆេះអស់ស្ទើរតែទាំងស្រុងទៅហើយ ព្រោះកន្លែងកើតហេតុឆ្ងាយពីសមត្ថកិច្ច ហើយករណីនេះ លោកសង្ស័យថា អាចបណ្តាលមកពីតប្រព័ន្ធដាក់ហ្គាសប្រើខុសបច្ចេកទេសទើបបណ្ដាលឲ្យឆេះ ៕ វណ្ណា
