សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់បើករថយន្តឡិចសុីសRX330មួយគ្រឿងធ្វើដំណើរតាមដងផ្លូវសុខៗ ស្រាប់តែឆេះឡើងបង្កការភ្ញាក់ផ្អើលដល់ប្រជាពលរដ្ឋ ដែលនៅក្បែរយកទឹកជួយពន្លត់ទាន់ពេលវេលា ។
ហេតុការណ៍នេះបានកើតឡើងកាលពីវេលាម៉ោង២ និង២០នាទីរំលងអធ្រាត្រ ឈានចូលថ្ងៃអង្គារ ៧កើត ខែបឋមាសាឍ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី១៩ ខែមិថុនា ឆ្នាំ២០១៨ នៅចំណុចមុខវិទ្យាស្ថាន វណ្ណដា តាមបណ្តោយផ្លូវម៉ៅសេទុង ស្ថិតក្នុងសង្កាត់ទំនប់ទឹក ខណ្ឌចំការមន រាជធានីភំ្នពេញ ។
តាមសាក្សីនៅកន្លែងកើតហេតុបានឲ្យដឹងថា មុនពេលកើតហេតុគេបានឃើញបុរសម្នាក់បើករថយន្តម៉ាកឡិចសុីសRX330 ពណ៌ស ពាក់ស្លាកលេខ ភ្នំពេញ2P 9853 ធ្វើដំណើរតាមបណ្តោយផ្លូវម៉ៅសេទុង ក្នុងទិសដៅពីលិចទៅកើត ខណៈមកដល់ចំណុចកើតហេតុ ស្រាប់តែឆ្លងចរន្តអគ្គីសនីឆាបឆេះភ្លាម ក៏ត្រូវបានប្រជាពលរដ្ឋនាំគ្នាដងទឹកពន្លត់ទាន់ពេលវេលា ដោយមិនមានមនុស្សរងរបួសនោះទេ គ្រាន់តែរងការខូចខាតតែប៉ុណ្ណោះ ។
ក្រោយកើតហេតុ សមត្ថកិច្ចចុះមកដល់ចំណុចកើតហេតុ និងពិនិត្យជាក់ស្តែងដោយមិនមានប៉ះពាល់ដល់អ្នកដទៃ ទើបប្រគល់រថយន្តឲ្យម្ចាស់យកទៅជួសជុលខ្លួនឯង ៕ សុខាសែនជ័យ
