សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិនៅព្រឹកថ្ងៃសៅរ៍ ៣រោច ខែបឋមាសាឍ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី៣០ ខែមិថុនា ឆ្នាំ២០១៨ បានអញ្ជើញ ជាអធិបតី ផ្ទេរតំណែងស្តីទីសំខាន់ៗចំនួន៣ជូនដល់ នាយឧត្តមសេនីយ៍ សៅ សុខា និងឧត្តមសេនីយ៍ឯក ហ៊ុន ម៉ាណែត នៅក្រសួងការពារជាតិ។
គួរបញ្ជាក់ថា៖ តំណែងស្តីទីសំខាន់ៗនេះគឺមាន អគ្គមេបញ្ជាការស្តីទីនៃកងយោធពលខេមរភូមិន្ទ ដែលត្រូវបានប្រគល់ជូន នាយឧត្តមសេនីយ៍ សៅ សុខា អគ្គមេបញ្ជាការរង នៃខ.ភ.ម និងជាមេបញ្ជាការកងរាជអាវុធហត្ថលើផ្ទៃប្រទេស ហើយតំណែង២ទៀតគឺ នាយសេនាធិការចម្រុះស្តីទី នៃខ.ភ.ម និងមេបញ្ជាការស្តីទី នៃបញ្ជាការដ្ឋានកងទ័ពជើងគោក ត្រូវបានប្រគល់ជូន ឧត្តមសេនីយ៍ឯក ហ៊ុន ម៉ាណែត។ ការផ្ទេរតំណែងស្តីទីនេះ ធ្វើឡើងដោយសារតែមេទ័ពសំខាន់ៗទាំង៣រូប ដែលកាន់តំណែងទាំងនេះ បានព្យួរតួនាទី ដើម្បីឈរឈ្មោះជាបេក្ខជនតំណាងរាស្រ្តអាណត្តិទី០៦ សម្រាប់គណបក្សប្រជាជនកម្ពុជា។
នាយឧត្តមសេនីយ៍ ប៉ុល សារឿន អគ្គមេបញ្ជាការ នៃខ.ភ.ម បានឈរឈ្មោះជាបេក្ខជនតំណាងរាស្រ្តលេខរៀងទី១ នៅមណ្ឌលព្រះសីហនុ។ នាយឧត្តមសេនីយ៍ គន់ គីមនាយសេនាធិការចម្រុះ នៃខ.ភ.ម បានឈរជាបេក្ខជនតំណាងរាស្រ្តពេញសិទ្ធិតែមួយគត់ នៅមណ្ឌលឧត្តរមានជ័យ។ នាយឧត្តមសេនីយ៍ មាស សុភា មេបញ្ជាការកងទ័ពជើងគោក បានឈរជាបេក្ខជនតំណាងរាស្រ្តពេញសិទ្ធិតែមួយគត់ នៅមណ្ឌលព្រះវិហារ។
អ្នកនាំពាក្យក្រសួងការពារជាតិ នាយឧត្តមសេនីយ៍ ឈុំ សុជាតិ បានថ្លែងថា ការព្យួរតួនាទីបណ្តោះអាសន្ន សម្រាប់មេទ័ពទាំង៣ នៅក្នុងក្របខណ្ឌក្រសួងការពារជាតិនេះ គឺអនុវត្តទៅតាមច្បាប់ ស្តីពីការបោះឆ្នោតជ្រើសតាំងតំណាងរាស្រ្ត របស់ព្រះរាជាណាចក្រកម្ពុជា។
បើតាមមាត្រា២៥ នៃច្បាប់ស្តីពីការបោះឆ្នោតជ្រើសតាំងតំណាងរាស្រ្ត និងប្រកាស៤.៣ នៃបទបញ្ជា និងនីតិវិធីសម្រាប់ការបោះឆ្នោត ជ្រើសតាំងតំណាងរាស្រ្ត នីតិកាលទី៦ គឺតម្រូវឱ្យមន្រ្តីរាជការ មន្រ្តីតុលាការ កងកម្លាំងនគរបាលជាតិ កងយោធពលខេមរភូមិន្ទ សមាជិកក្រុមប្រឹក្សាធម្មនុញ្ញ សមាជិកឧត្តមក្រុមប្រឹក្សា នៃអង្គចៅក្រម និងបព្វជិតសាសនា ដែលមានបំណងឈរឈ្មោះបោះឆ្នោត ជ្រើសតាំងតំណាងរាស្រ្ត ត្រូវដាក់ពាក្យសុំច្បាប់ឈប់ពិសេស ឬលាចាកសិក្ខាបទរហូតដល់ ថ្ងៃប្រកាសលទ្ធផលនៃការបោះឆ្នោត ជាស្ថាពរយ៉ាងតិច៧ថ្ងៃ មុនថ្ងៃបើកយុទ្ធនាការឃោសនាបោះឆ្នោត។
សូមបញ្ជាក់ថា ក្រៅពីពិធីផ្ទេរតំណែងស្តីទីខាងលើ នៅថ្ងៃនេះ សម្តេចពិជ័យសេនា ទៀ បាញ់ នឹងអញ្ជើញជាអធិបតីពិធីបញ្ចុះបឋមសិលាបុកគ្រឹះសាងស ង់ទីស្តីការក្រសួងការពារ៕ សហការី
