សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ កម្មករសំណង់ ក្នុងក្រុមហ៊ុនសំណង់ចិនមួយកន្លែង ស្ថិតនៅផ្លូវR8 ក្នុងតំបន់អតីតបឹងកក់ បាននាំគ្នារត់ចែកជើងគ្នា បន្ទាប់ពីពួកគេកំពុងតែធ្វើការដូចសពដងក៏ប្រទះឃើញគ្រាប់បែកមិនទាន់ផ្ទុះមួយគ្រាប់ដែលគប់ក្នុងដី ។
ករណីភ្ញាក់ខាងលើនេះ បានកើតឡើងកាលពីព្រឹកថ្ងៃពុធ ៧រោច ខែបឋមាសាឍ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី៤ ខែកក្កដា ឆ្នាំ២០១៨ វេលាម៉ោង៨និង៣០នាទី ស្ថិតនៅតាមបណ្ដាផ្លូវR8 ស្ថិតក្នុងសង្កាត់ស្រះចក ខណ្ឌដូនពេញ ។
យោងតាមសម្តីពីក្រុមសន្ដិសុខ ដែលយាមប្រចាំការដ្ឋាន និងកម្មករសំណង់នៅកន្លែងកើតហេតុ បានឲ្យដឹងថា បន្ទាប់ពីពួកគាត់ធ្វើការបូមលូ ដែលជាកន្លែងធ្វើរង្វង់មូលក្នុងការដ្ឋានសំណង់ខាងនោះ ស្រាប់តែប្រទះឃើញគ្រាប់បែកផុតឡើងមកជាមួយអាចម៍ដី ធ្វើឲ្យមានភ្ញាក់ផ្អើលដល់កម្មករ និងសន្ដិសុខ នាំគ្នារត់ចែកជើងគ្នាបង្កការភ្ញាក់ផ្អើលតែម្តង ។
ក្រោយកើតហេតុសមត្ថកិច្ចមូលដ្ឋានបានចុះមកដល់កន្លែងកើតហេតុ និងរាយការណ៍ទៅខាងស៊ីម៉ាក់ ដែលជំនាញខាងដោះគ្រាប់មិនទាន់ផ្ទុះឲ្យចុះមកពិនិត្យមើលនិងយកទៅរក្សាទុកផងដែរ ៕ស តារា
