សារព័ត៌មាន នគរវត្ត តែងតែនាំមុខគេជានិច្ច
ខេត្តសៀមរាប៖ បុរសម្នាក់ជាចាងហ្វាងកាសែតដំណឹងកម្ពុជាត្រូវសមត្ថកិច្ចចាប់ខ្លួនពីបទបាញ់គំរាម ។
សេចក្តីរាយការណ៍បានឲ្យដឹងថា សមត្ថកិច្ចនគរបាលស្រុកស្វាយលើ សហការជាមួយកម្លាំងកងរាជអាវុធហត្ថស្រុក និងយោធាស្រុក ក្នុងនោះមានការអនុញ្ញាតពីលោក កើត វណ្ណរ៉េត ព្រះរាជអាជ្ញាអមសាលាដំបូងខេត្តសៀមរាប បានរឃាត់ខ្លួនចាងហ្វាងកាសែតដំណឹងកម្ពុជាម្នាក់ និងរថយន្តមួយគ្រឿង បន្ទាប់ពីបានបាញ់គំរាមទៅលើទាហានម្នាក់ ។
សមត្ថកិច្ចនគរបាលស្រុកស្វាយលើបានបញ្ជាក់ថា ជនរងគ្រោះឈ្មោះ ម៉ី ស៊ូ ភេទប្រុស អាយុ៤០ឆ្នាំ មុខរបរយោធា មានទីលំនៅភូមិ ដំណាក់ ឃុំកំពង់ប្រណាក ស្រុកព្រះវិហារ ខេត្តព្រះវិហារ ។ ចំណែកជនសង្ស័យមានឈ្មោះ ឆោម ស៊ីថា ភេទប្រុស អាយុ៥៥ឆ្នាំ មុខរបរ ចាងហ្វាងកាសែតដំណឹងកម្ពុជា មានទីលំនៅភូមិបាយាប សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ស្នាក់នៅសាខាស្នាក់ការកាសែត នៅភូមិទឹកលិច ឃុំបឹងមាលា ស្រុកស្វាយលើ ខេត្តសៀមរាប ។
ករណីបាញ់គំរាមនេះបានកើតឡើងស្ថិតនៅ ស្រុកស្វាយលើ ខេត្តសៀមរាប កាលពីថ្ងៃទី១០ ខែកក្កដា ឆ្នាំ២០១៨ ៕
