ពលរដ្ឋព្រួយបារម្ភពីបញ្ហាអសន្តិសុខសង្គម និងការរីករាលដាលនៃបទល្មើសគ្រឿងញៀន និងល្បែងស៊ីសងកំពុងកើតពេញបន្ទុកនៅខេត្តសៀមរាប

ចែករំលែក៖

ខេត្តសៀមរាប ៖ ពលរដ្នតែងតែលើកឡើងថា ល្បែងស៊ីសង អំពើចោរកម្ម និងបទល្មើសជួញដូរ ចែកចាយ និងប្រើប្រាស់គ្រឿងញៀនក្នុងខេត្តសៀមរាប កំពុងតែកើតឡើងយ៉ាងរីករាលដាលធ្វើឲ្យប៉ះពាល់យ៉ាងខ្លាំងដល់បញ្ហាសន្តិសុខសង្គម ខុសពីមុនឆ្ងាយណាស់ ។

ប្រជាពលរដ្ឋក្នុងក្រុងសៀមរាប ខេត្តសៀមរាប ចង់ជម្រុញសុំឲ្យលោក ឃឹម ប៊ុនសុង អភិបាលខេត្តសៀមរាប និងលោក ទិត្យ ណារ៉ុង ស្នងការនគរបាលខេត្តសៀមរាប យកចិត្តទុកដាក់ពង្រឹងសនិ្តសុខសង្គមឲ្យស្របតាមគោលនយោបាយភូមិ-ឃុំមានសុវត្ថិភាពទាំង៩ចំណុចនោះផង ។

ជាក់ស្ដែងកាលពីថ្ងៃទី០៩ ខែកក្កដា ឆ្នាំ២០១៨ សមត្ថកិច្ចនគរបាលខេត្តសៀមរាប បានបង្ក្រាបទីតាំងហ្គេមបាញ់ត្រីមួយកន្លែងនៅក្នុងភូមិតាភុល សង្កាត់ស្វាយដង្គំ ក្រុងសៀមរាប ហើយឃាត់ខ្លួនមនុស្ស២នាក់ ដែលជាប់ពាក់ព័ន្ធនឹងបទល្មើសគ្រឿងញៀន ។ នឹងថ្ងៃបន្ទាប់ទី១០ ខែកក្កដា ឆ្នាំ២០១៨ សមត្ថកិច្ចនគរបាលខេត្តសៀមរាប បានចាត់វិធានការឃាត់ខ្លួនក្រុមចោរឆក់ចំនួន១០នាក់ដែលជាប់ពាក់ព័ន្ធទៅនឹងករណីលួចឆក់ក្នុងខេត្តសៀមរាប យ៉ាងពេញបន្ទុកនាពេលកន្លងមក ។ ការបង្ក្រាបរបស់សមត្ថកិច្ចនគរបាលខេត្តសៀមរាប គឺជាភស្ដុតាងបង្ហាញថា បច្ចុប្បន្នអំពើចោរកម្មក្នុងខេត្តសៀមរាប កំពុងកើតឡើងយ៉ាងពេញបន្ទុក ធ្វើឲ្យប្រជាពលរដ្ឋព្រួយបារម្ភយ៉ាងខ្លាំងអំពីបញ្ហាអសន្តិសុខសង្គម ។

ការបង្ក្រាបរបស់សមត្ថកិច្ច មិនបានធ្វើឲ្យប្រជាពលរដ្ឋក្នុងក្រុងសៀមរាប មានការជឿជាក់នោះទេព្រោះបច្ចុប្បន្នល្បែងស៊ីសងច្រើនប្រភេទ ក៏ដូចជាបទល្មើសគ្រឿងញៀនកំពុងរាលដាលពេញក្រុងសៀមរាប ហើយសមត្ថកិច្ចបង្ក្រាបបានតែបទល្មើសតូចតាចប៉ុណ្ណោះ ។ ប្រជាពលរដ្ឋបានរិះគន់ថាល្បែងស៊ីសងតាមប្រព័ន្ធអនឡាញ និងល្បែងបញ្ជល់ មាន់បៀរអាប៉ោងជាដើមនៅតែកើតឡើងយ៉ាងរាលដាល ហើយការបង្ក្រាបរបស់សមត្ថកិច្ចភាគច្រើនគ្រាន់តែធ្វើឡើងដើម្បីឲ្យល្អមើលបំភាន់ភ្នែកមហាជនតែប៉ុណ្ណោះ ។

ប្រជាពលរដ្ឋក្នុងក្រុងសៀមរាប និងនៅតាមបណ្ដាស្រុកមួយចំនួននៃខេត្តសៀមរាប បានអំពាវនាវឲ្យថ្នាក់ដឹកនាំក្រសួងមហាផ្ទៃ ក៏ដូចជា នាយឧត្តមសេនីយ៍ នេត សាវឿន អគ្គស្នងការនគរបាលជាតិ ពិនិត្យឡើងវិញអំពីភាពអសកម្មមួយចំនួនរបស់ដឹកនាំខេត្តសៀមរាប ដែលមានលោក ឃឹម ប៊ុនសុង អភិបាលខេត្តសៀមរាប និងលោក ទិត្យ ណារ៉ុង ស្នងការនគរបាលខេត្តសៀមរាប ជាបន្ទាន់ផងដែរ ។ ប្រសិនបើមន្ត្រីអាជ្ញាធរគ្រប់លំដាប់ថ្នាក់ និងសមត្ថកិច្ចគ្រប់លំដាប់ថ្នាក់ក្នុងខេត្តសៀមរាប យកចិត្តទុកដាក់អនុវត្តន៍តាមគោលនយោបាយភូមិ-ឃុំ មានសុវត្ថិភាពទាំង៩ចំណុចនោះ គឺអំពើចោរកម្មលួចឆក់ប្លន់ ល្បែងស៊ីសង និងបទល្មើសជួញដូរចែកចាយប្រើប្រាស់គ្រឿងញៀនមិនកើតឡើងយ៉ាងរាលដាលដូចសព្វថ្ងៃនេះទេ៕ ប៊ុនរិទ្ធី