សារព័ត៌មាន នគរវត្ត តែងតែនាំមុខគេជានិច្ច
ខេត្តសៀមរាប ៖ កាលពីព្រឹកថ្ងៃសុក្រ ១កើត ខែទុតិយាសាឍ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី១៣ ខែកក្កដា ឆ្នាំ២០១៨ លោក ឆោម ស៊ីថា ចាងហ្វាងកាសែត«ដំណឹងកម្ពុជា» ដែលត្រូវនគរបាលស្រុកស្វាយលើចាប់ខ្លួន សង្ស័យពាក់ព័ន្ធករណីផ្ទុះអាវុធនោះ ត្រូវតុលាការសម្រេចឃុំខ្លួនដាក់ពន្ធនាគារបណ្តោះអាសន្ន។
អ្នកនាំពាក្យរបស់សាលាដំបូងខេត្តសៀមរាប លោក យិន ស្រាង ថ្លែងថា អ្នកកាសែតឈ្មោះឆោម ស៊ីថា ភេទប្រុសដែលត្រូវសមត្ថកិច្ចស្រុកស្វាយលើចាប់ឃាត់ខ្លួននោះ ចៅក្រមស៊ើបសួរនៃសាលាដំបូងខេត្តសៀមរាបលោក អ៊ុំចាន់ថុល បានចេញដីការសម្រេចឃុំ ខ្លួនដាក់ពន្ធនាគារ ជាបណ្តោះអាសន្នហើយនៅព្រឹកថ្ងៃទី១៣ខែកក្កដានេះដោយចោទប្រកាន់ចំនួនពីរបទល្មើស ។ លោកបន្តថា បទល្មើសទី១ “ប្រើប្រាស់អាវុធខុសច្បាប់” និងទី២ “គំរាម កំហែង ដោយមានបញ្ជារឲ្យបំពេញលក្ខណៈអ្វីមួយ” តាមមាត្រា៤៩០និងមាត្រា២៣២នៃក្រមមព្រហ្មទណ្ឌ ។
លោក ឆោម ស៊ីថា ត្រូវសមត្ថកិច្ចចាប់ខ្លួននៅថ្ងៃទី១០ ខែកក្កដាឆ្នាំ២០១៨ ក្នុងភូមិសាស្ត្រស្រុកស្វាយលើ ខេត្តសៀមរាប។
គេបានបង្ហាញថា ជនរងគ្រោះក្នុងហេតុការណ៍មានឈ្មោះ ម៊ី ស៊ូ ភេទប្រុស អាយុ៤០ឆ្នាំ មុខរបរ យោធា មានទីលំនៅភូមិដំណាក់ ឃុំកំពង់ ប្រណាក ស្រុកព្រះវិហារ ខេត្ត ព្រះវិហារ ។ ចំណែកជនសង្សយ័ឈ្មោះឆោម ស៊ីថា ភេទប្រុស អាយុឆ្នាំ៥៥មុខរបរ ចាងហ្វាងកាសែតដំណឹងកម្ពុជា មានទីលំនៅ ភូមិបាយាប សង្កាត់ភ្នំពេញថ្មី ខណ្ឌ័សែនសុខ រាជធានីភ្នំពេញ មុនចាប់ខ្លួនស្នាក់នៅសាខាស្នាក់ការកាសែត នៅភូមិ ទឹកលិច ឃុំបឹងមាលា ស្រុកស្វាយលើ ខេត្តសៀមរាប។
ក្នុងបទសម្ភាសន៍មុនពេលបញ្ជូនទៅតុលាការ លោក ឆោម ស៊ីថា បញ្ជាក់ថា រូបលោកមិនដែលមានកាំភ្លើងប្រើនោះទេ ហើយស្ទើរតែមិនដែលស្គាល់កាំភ្លើងច្បាស់ផង ព្រោះរូបលោកមិនធ្លាប់ធ្វើជាកងកម្លាំងអ្វីសោះ ចេញពីបួសជាព្រះសង្ឃគឺធ្វើជាអ្នកកាសែតរហូត ។ ចឹងទេបើរឿងប្រើប្រាស់កាំភ្លើងពិតជាមិនមានឡើយ ។
នៅថ្ងៃកើតហេតុ រូបលោកដេកក្នុងស្នាក់ការរហូតម៉ោង៦ល្ងាច ទើបប្អូនហៅផឹក ។ លុះចប់ពីផឹកអំឡុងម៉ោង៨យប់ ក៏បើកឡានមកស្នាក់ការវិញ តែត្រូវសមត្ថកិច្ចស្ទាក់ឆែកឡានសួររកកាំភ្លើងតែម្តង ។ ភ្លាមៗលោកអនុញ្ញាតឲ្យឆែក លុះឆែកមិនឃើញមានកាំភ្លើងហើយ សមត្ថកិច្ចបែរជាដាក់ខ្នោះដៃរូបលោកទៀត ។ តាមពិតរូបលោកមិនបានដឹងរឿងថា មានអ្នកណាដឹកអីវ៉ាន់ពីណាទៅណា ហើយមានការប្រដេញឡានគ្នា ដូចសមត្ថកិច្ចថានោះទេ។ នេះជាការចោទប្រកាន់រូបលោកខុសតែម្តង។ យ៉ាងណា លោកបានសុំឲ្យតុលាការ បើកការស៊ើបអង្កេតដោយជាក់លាក់ មុនពេលផ្តន្ទាទោសរូបលោក ។
គួរបញ្ជាក់ថា នៅវេលាម៉ោង១១និង៣០នាទីថ្ងៃទី១០ ខែកក្កដា២០១៨ជនរងគ្រោះបានបើកឡានដឹកឥវ៉ាន់ពីខេត្តព្រះវិហារមកខេត្តសៀមរាប ។ លុះដល់វេលាម៉ោងបីរសៀល ថ្ងៃដដែល ក្រោយដាក់ឥវ៉ាន់រួចក៏ត្រឡប់មកខេត្តព្រះវិហារវិញ ដោយមានម៉ូយជិះ ជាមួយគ្នាពីនាក់ លុះពេលបើកដល់ខាងជើង ផ្សារស្វាយលើថ្មី ស្រាប់តែជនសង្សយ័ខាងលើបានបើកឡានម៉ាកកាម៉ារី សេរីឆ្នាំ2007(ហាយហ្វ្រីត)ពណ៌ស ពាក់ស្លាកលេខ ភ្នំពេញ 2AM-1240 តាមពីក្រោយឡានជនរងគ្រោះ ពេលបើកដល់ចំនុចខាងកើតស្នាក់ការបរិស្ថានក្បាលប្រើសឡានជនសង្ស័យបានឡើងវ៉ា រួចចុចកញ្ចក់ឡានយកកាំភ្លើងខ្លីមកភ្ជង់ ជនរងគ្រោះរួចស្រែកជេរថា អាហែងឈ្លើយឆាប់ឈប់ឡានភ្លាម ។
ដោយជនរងគ្រោះមិនឈប់ហើយបន្ថែមល្បឿន ជនសង្សយ័ក៏បន្ថែមល្បឿនដូចគ្នា បន្ទាប់មកក៏បានយកកាំភ្លើងបាញ់គំរាមទៅលើជនរងគ្រោៈចំនួនមួយគ្រាប់។ ពេលនោះជនរងគ្រោះបានបើកឡានបន្តមិនហ៊ានឈប់ ហើយជនសង្សយ័ក៍នៅតែបើកតាមបន្តទៀតលុះបើកដល់ចំនុចការដ្ឋានកិនថ្មក្បែរអង់តែនទូរសព្ឌ័ភ្នំក្បាលប្រើស ភូមិអង្កាញ់ឃុំស្វាយលើជនសង្សយ័បានវ៉ាទៅមុនហើយឈប់ឡានពាំងពីមុខឡានជនរងគ្រោះ បើកទ្វារឡានចុះមកហើយមានកាន់កាំភ្លើងខ្លីទើបជនរងគ្រោះស្គាល់ឈ្មោះ ឆោម សីុថា ជាអ្នកកាសែត។
ឃើញដូចនេះជនរងគ្រោះបានបន្ថែមល្បឿនទៅមុខទៀត ស្របពេលនោះ ជនសង្ស័យបានស្រែកឲ្យឈប់ភ្លាម ជនរងគ្រោះមិនឈប់ ទើបជនសង្ស័យបានបាញ់គំរាមមួយគ្រាប់ទៀត ។ ក្រោយពេលសម្ថកិច្ចបានទៅ ដល់កន្លែងកើតហេតុ ធ្វើការពិនិត្យុ និងមានការរាយការណ៏់៍ពីជនរងគ្រោះ រួមនិងព្រះរាជអាជ្ញាខេត្តព្រះវិហារ និងបានការអនុញ្ញាតពីលោក កើត វណ្ណរ៉េត ព្រះរាជអាជ្ញាអមសាលាដំបូងខេត្តសៀមរាបផង សមត្ថកិច្ចឃាត់ខ្លួនឆោម ស៊ីថាតែម្តង ៕
