សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ យ៉ាងហោចណាស់ស្ត្រី២នាក់ម្ដាយ និងកូនស្រីបានរងរបួសធ្ងន់ស្រាលដោយសារករណីគ្រោះថ្នាក់ចរាចរណ៍ រថយន្តបើកបរល្បឿនលឿនមិនប្រកាន់ស្ដាំទៅបុក និងម៉ូតូ១គ្រឿង ដែលបញ្ច្រាសគ្នាកាលពីវេលាម៉ោង៣រសៀល ថ្ងៃសុក្រ ១កើត ខែទុតិយាសាឍ ឆ្នាំច សំរិទ្ធិស័ក ព.ស. ២៥៦២ ត្រូវនឹងថ្ងៃទី១៣ ខែកក្កដា ឆ្នាំ២០១៨ ស្ថិតត្រង់ចំណុចភូមិឈើភ្លើង ឃុំកំពង់ត្រាច ស្រុករមាសហែកខេត្តស្វាយរៀង ។
នគរបាលស្រុករមាសហែកបានឲ្យដឹងថា អ្នករងគ្រោះឈ្មោះ ពៅ ផល្លី ភេទស្រី អាយុ37ឆ្នាំ រស់នៅភូមិពោន ឃុំដូងស្រុករមាសហែកដោយដឹកកូនស្រីម្នាក់ឈ្មោះ អឿន លក្ខណាមានអាយុ 10ឆ្នាំ ខណៈជិះម៉ូតូម៉ាក HONDA. C125 ពណ៍ខ្មៅពាក់ ស្លាកលេខ ស្វាយរៀង 1I.6341ខូចខាតយ៉ាងដំណំ ។
ប្រភពបន្តថា ចំពោះអ្នកបើករថយន្តបង្កហេតុមានឈ្មោះ សួន សារឿន ភេទប្រុស អាយុ31ឆ្នាំ រស់នៅភូមិព្រេច ឃុំច្រេស ស្រុកមេសាង ខេត្តព្រៃវែង និងអ្នករួមដំណើរ២នាក់មានឈ្មោះ ដួង ដារ៉ា ភេទប្រុស អាយុ25ឆ្នាំ រស់នៅភូមិចុងអូ ឃុំកំពង់ត្រាចស្រុករមាសហែក និង ឈ្មោះ ពី ឡុង ភេទប្រុស អាយុ52ឆ្នាំ ជជនជាតិចិនដោយបើករថយន្តម៉ាកSSANG YONG ពណ៌ស ពាក់ស្លាកលេខ ភ្នំពេញ 2F.846 ។
តាមសាក្សីបានឲ្យដឹងថា មុនកើតហេតុគេឃើញស្រីម្នាក់បានជិះម៉ូតូមួយគ្រឿង ឌុបកូនស្រីដោយធ្វើដំណើរពីលិចមកកើត ខណៈនោះស្រាប់តែមានរថយន្តមួយគ្រឿង SSANG YONG ពណ៍ស ពាក់ស្លាកលេខ ភ្នំពេញ2F.846 និងអ្នកជិះក្នុងរថយន្ត២នាក់ ដែលបើកបញ្ច្រាសទិសគ្នាល្បឿនលឿនមិនប្រកាន់ស្ដាំបុកពេញទំហឹងតែម្ដង ។
ក្រោយកើតហេតុសមត្ថកិច្ចមូលដ្ឋានបានមកដល់ និងវាស់វែងព្រមទាំងបានបញ្ជួនជនរងគ្រោះទៅព្យាបាលនៅមន្ទីរពេទ្យបង្អែកស្រុករមាសហែក និងអូសវត្ថុតាងម៉ូតូ និងរថយន្តមកកាន់អធិការដ្ឋាននគរបាលស្រុករមាសហែកដើម្បីចាត់ការបន្តតាមច្បាប់ ៕ យឹម សុថាន
