សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ជនសង្ស័យម្នាក់ ធ្វើសកម្មភាពចូលលួចទ្រព្យសម្បត្តិក្នុងផ្ទះមន្រ្តីនគរបាលម្នាក់ បានសម្រេចកាលពីថ្ងៃទី៨ ខែកក្កដា ឆ្នាំ២០១៨ វេលាម៉ោង៤និង១៥នាទីរសៀល នៅចំណុចក្នុងផ្ទះលេខ១២Eo ផ្លូវលេខ៩០ ភូមិទី១១ សង្កាត់ស្រះចក ខណ្ឌដូនពេញ រាជធានីភ្នំពេញ ហើយគេចខ្លួនបាត់ដោយសុវត្ថិភាពអស់រយៈពេលជិត២០ថ្ងៃ ទើបសមត្ថកិច្ចព្រហ្មទណ្ឌខណ្ឌដូនពេញ សហការជាមួយកម្លាំងប៉ុស្តិ៍នគរបាលរដ្ឋបាលស្រះចក ស្រាវជ្រាវឃាត់ខ្លួនបាន នៅព្រឹកថ្ងៃអង្គារ៍ ១២កើត ខែទុតិយាសាឍ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី២៤ ខែកក្កដា ឆ្នាំ២០១៨ វេលាម៉ោង០៧និង០០នាទី ក្នុងមូលដ្ឋានខណ្ឌដូនពេញ ។
ជនសង្ស័យត្រូវឃាត់ខ្លួនឈ្មោះ ចាន់ សំណាង ភេទប្រុសអាយុ២៤ឆ្នាំជនជាតិខ្មែរមុខរបរមិនប្រាកដមានទីលំនៅមិនពិតប្រាកដ។ ជនរងគ្រោះឈ្មោះជា ច័ន្ទ ភេទប្រុសអាយុ៥៩ឆ្នាំ ជនជាតិខ្មែរ មុខរបរនគរបាល មានទីលំនៅផ្ទះលេខ១២អឺ០ផ្លូវលេខ៩០ សង្កាត់ស្រះចក ខណ្ឌដូនពេញ រាជធានីភ្នំពេញ។
ក្រោយឃាត់ខ្លួនជនសង្ស័យរួច សម្ភារៈបាត់បង់មាន៖ ទូរស័ព្ទដៃម៉ាកអាយហ្វូន7 ពណ៌ផ្កាឈូក១គ្រឿង និងទូរស័ព្ទដៃម៉ាកអាយហ្វូន៧ ពណ៌ស១គ្រឿង ព្រមទាំងលុយ១.០០០ដុល្លារអាមេរិក ។ហើយជនសង្ស័យធ្លាប់ប្រើប្រាស់គ្រឿងញៀន ។
បច្ចុប្បន្នជនសង្ស័យត្រូវបានសមត្ថកិច្ចឃាត់ខ្លួននៅអធិការដ្ឋាននគរបាលខណ្ឌដូនពេញ ដើម្បីកសាងសំណុំរឿងតាមនីតិវិធី ៕ស តារា
