សារព័ត៌មាន នគរវត្ត តែងតែនាំមុខគេជានិច្ច
ខេត្តឧត្ដរមានជ័យ៖ នៅព្រឹកថ្ងៃអង្គារ ៤រោច ខែទុតិយាសាឍ ឆ្នាំច សំរឹទ្ធិស័ក ព.ស. ២៥៦២ ត្រូវនឹងថ្ងៃទី៣១ ខែកក្កដា ឆ្នាំ២០១៨កម្លាំងអធិការដ្ឋាននគបាល ស្រុកចុងកាល់ បានធ្វើការឃាត់ខ្លួន ស្រ្ដីអាយុ៥១ឆ្នាំម្នាក់ ក្រោមការបញ្ជាផ្ទាល់របស់លោក ឧត្ដមសេនីយ៍ទោម៉ែន លី ស្នងការនគបាលខេត្តឧត្ដរមានជ័យ ។
ស្រ្ដីដែលត្រូវបានសមត្ថកិច្ចឃាត់ខ្លួននោះ ឈ្មោះ ជឿយ ចាន់ នី អាយុ៥១ឆ្នាំ ជាអាជីវករលក់គុយទាវ រស់នៅភូមិ គោកវត្ដ ឃុំចុងកាល់ ស្រុកចុងកាល់ ខេត្តឧត្ដរមានជ័យ ។
សមត្ថកិច្ចបានឲ្យដឹងថាការឃាត់ខ្លួន ស្រ្ដីខាងលើ ក្រោមបទបញ្ជារបស់ថ្នាក់លើ ដោយមូលហេតុ ស្រ្ដីរូបនេះបានទៅ ចូលរួមការបោះឆ្នោតជ្រើសតាំងតំណាងរាស្រ្ដនីតិកាលទី៦ដោយមានការជ្រលក់ថ្នាំ ម្រាមដៃចង្អុលទាំងសងខាងគឺទាំងពីរ ។
បច្ចុប្បន្នជនសង្ស័យខាងលើត្រូវបានសមត្ថកិច្ចចាត់ការទៅតាមច្បាប់ ៕ ប៉ែន នួន
