សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់ជាកម្មករផ្សាដែក ត្រូវបានឆក់ខ្សែភ្លើងធ្លាក់ពីលើដំបូលដាំក្បាលចុះក្រោម បណ្ដាលឲ្យរងរបួសធ្ងន់ធ្ងរ ហើយត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យភ្លាមៗ ដោយបង្កការភ្ញាក់ផ្អើលដល់កម្មករសំណង់ និងបងប្អូនប្រជាពលរដ្ឋរស់នៅជិតខាង កាលពីវេលាម៉ោង១៤និង១៥នាទី ថ្ងៃសុក្រ ៦កើត ខែស្រាពណ៍ ឆ្នាំច សំរឹទ្ធស័ក ព.ស ២៥៦២ ត្រូវនឹងថ្ងៃទី១៧ ខែសីហា ឆ្នាំ២០១៨ ស្ថិតសំណង់ផ្ទះល្វែងអត់ច្បាប់មួយកន្លែងក្នុងភូមិសំបួរ សង្កាត់ដង្កោ ខណ្ឌដង្កោ រាជធានីភ្នំពេញ ។
ជនរងគ្រោះដែលរងរបួសធ្ងន់ដោយសារឆក់ខ្សែភ្លើង នៅមិនស្គាល់អត្តសញ្ញាណនោះទេ គ្រាន់តែដឹងថា ជាកម្មករផ្សាដែក នៅទីតាំងខាងលើ ។
យោងតាមប្រភពព័ត៌មានពីកម្មករសំណង់នៅកន្លែងកើតហេតុ បានឲ្យដឹងថា មុនពេលកើតហេតុគេឃើញជនរងគ្រោះ បានឡើងនៅដំបូលផ្ទះទើបតែសាងសង់ ដើម្បីផ្សាដំបូល តែដោយសារមានខ្សែភ្លើងរញ៉ែរញ៉ៃ និងកៀកជាមួយដែកផងនោះ រួមទាំងជនរងគ្រោះមិនប្រយ័ត្ន ក៏បានឆ្លងចរន្តអគ្គិសនី ឆក់ជនរងគ្រោះធ្លាក់ចុះក្រោម បណ្ដាលឲ្យរងរបួសយ៉ាងធ្ងន់ធ្ងរ ។
ភ្លាមៗកម្មករសំណង់ និងបងប្អូនប្រជាពលរដ្ឋបានជួយចលនាបឯម និងបានទាក់ទងទៅរថយន្តសង្គ្រោះបន្ទាន់របស់មន្ទីរពេទ្យបង្អែកដង្កោ ចុះមកដឹកជនរងគ្រោះទៅសង្គ្រោះបន្ទាន់នៅមន្ទីរពេទ្យលោកសង្ឃ ។
សូមបញ្ជាក់ថា បន្ទាប់ពីមានករណីកម្មករផ្សាដែក ឆក់ចរន្តអគ្គិសនីបណ្តាលឲ្យរបួសធ្ងន់រួចមក សមត្ថកិច្ចនិងអាជ្ញាធរមូលដ្ឋាន បានចុះមកធ្វើការពិនិត្យដល់កន្លែងកើតហេតុ បានឃើញថា ទីតាំងសំណង់នេះ មិនមានការអនុញ្ញាតឲ្យសាងសង់ពីសំណាក់អាជ្ញាធរនោះទេ មិនតែប៉ុណ្ណោះគឺបានសាងសង់រំលោភចូលចំណីផ្លូវសាធារណៈចំនួន៥០ភាគរយនៃស្ថានភាពសំណង់ ដូច្នេះត្រូវតម្រូវឲ្យរុះរើចេញជាបន្ទាន់ ។ ដោយឡែកម្ចាស់ទីតាំង ភ្លាមៗបានគេចចេញបាត់ពីកន្លែងកើតហេតុតែម្តង ៕ ភារ៉ា ដង្កោ
