សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ អ្នកនាំពាក្យក្រសួងធនធានទឹក និងឧតុនិយមលោក ចាន់ យុត្ថា បានថ្លែងឲ្យដឹងថា គិតត្រឹមម៉ោង១រសៀលថ្ងៃ ពុធ ១១កើត ខែស្រាពណ៍ ឆ្នាំច សំរឹទ្ធិស័ក ព.ស. ២៥៦២ ត្រូវនឹងថ្ងៃទី២២ ខែសីហា ឆ្នាំ២០១៨ ស្ថានភាពទឹកជំនន់នៅស្ទឹងព្រែកត្នោត បានធូរស្រាលទាំងស្រុងហើយ មិនមានអ្វីដែលជាការគំរាមកំហែងដល់ប្រជាពលរដ្ឋ នៅខណ្ឌដង្កោ រាជធានីភ្នំ ពេញទៀតនោះទេ។
សម្រាប់ស្ថានភាពធូរស្រាលបែបនេះ ត្រូវបានលោក ចាន់ យុត្ថា ឲ្យដឹងថា ក្រុមការងារបច្ចេកទេសនៃក្រសួងធនធានទឹក និងអាជ្ញាធរមូលដ្ឋានពាក់ព័ន្ធនៅតែបន្ដតាមដានយ៉ាងយកចិត្តទុកដាក់ជានិច្ច ព្រោះខ្លាចក្រែងជំនន់ទឹកស្ទឹងនេះជន់ឡើងវិញ ។
អ្នកនាំពាក្យរូបនេះបានបញ្ជាក់យ៉ាងដូច្នេះថា ចាប់ពីម៉ោង១១មកដល់ម៉ោង១រសៀលនេះទឹកនៅចំណុចទ្វារទឹក៧មករា បានស្រកចុះចំនួន២សង់ទីម៉ែត្រ មានន័យថា វាមានសញ្ញាណក្នុងការធូរស្រាលហើយ ប៉ុន្តែយើងមិនទាន់អាចបោះបង់ការប្រុងប្រយ័ត្នបាននៅឡើយទេជារួមស្ថានភាពទឹកជំនន់ស្ទឹងព្រែកត្នោតនៅក្នុងភូមិសាស្ត្ររាជធានីភ្នំពេញ និងខេត្តកណ្តាល ត្រូវការពេលវេលាប្រមាណ១២ម៉ោងទៀត ទើបបានធូរស្រាល ។
សូមជម្រាបថា នៅយប់ថ្ងៃទី២១ ខែសីហា ឆ្នាំ២០១៨ ជំនន់ទឹកស្ទឹងព្រែកត្នោត បានគំរាមកំហែងកាន់តែខ្លាំង ដល់ប្រជាពលរដ្ឋរស់នៅក្នុងខណ្ឌដង្កោ រាជធានីភ្នំពេញ ហើយលោករដ្ឋមន្ដ្រី លឹម គានហោ បានដឹកនាំមន្ដ្រីជំនាញចុះទៅពិនិត្យផ្ទាល់ និងដាក់ ចេញនូវវិធានការភា្លមៗឲ្យក្រុមការងារដាក់ពង្រាយនៅតាមទំនប់សណ្ដដើម្បីគ្រប់គ្រងមួយយប់ទល់ភ្លឺមិនឲ្យសម្រាកឡើយ ៕ ហេង សូរិយា
