សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ កម្លាំងប៉ុស្តិ៍នគរបាលរដ្ឋបាលជ័យជំនះ សហការជាមួយកំលាំងផ្នែកយុត្តិធម៌នៃអធិការដ្ឋាននគរបាលខណ្ឌដូនពេញ ធ្វើការស្រាវជ្រាវតាមចាប់ឃាត់ខ្លួនជនសង្ស័យ៤នាក់ បន្ទាប់ពីប្រើកូនកាំបិតភ្ជង់គំរាមយកទ្រព្យសម្បត្តិ ពីបុរសជនជាតិអង់គ្លេសម្នាក់ បានសម្រេចហើយព្យាយាមរត់គេចខ្លួនបាត់ជាង១០ម៉ោង ក៏ត្រូវសមត្ថកិច្ចក្របួចជាប់តែម្តង ។
ករណីឃាត់ខ្លួនជនសង្ស័យទាំង៤នាក់នេះ បានធ្វើឡើងកាលពីវេលាម៉ោង១និង៣០នាទីរសៀល ថ្ងៃព្រហស្បតិ៍ ៤រោច ខែស្រាពណ៌ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី៣០ ខែសីហា ឆ្នាំ២០១៨ ពីបទ លួចមានស្ថានទម្ងន់ទោសប្រើអំពើហិង្សា (យកកូនកាំបិតភ្ជង់គំរាមយកទ្រព្យសម្បត្តិ) ដែលប្រព្រឹត្តិកាលពីថ្ងៃទី៣០ ខែសីហា ឆ្នាំ២០១៨ វេលាម៉ោង១និង៣០នាទីរំលងអាធ្រាត្រ នៅចំណុចមុខផ្ទះលេខ២០អឺផ្លូវលេខ១៥៤ភូមិទី៥សង្កាត់ជ័យជំនះខណ្ឌដូនពេញរាជធានីភ្នំពេញ។
ជនសង្ស័យត្រូវឃាត់ខ្លួនគឺ ៖
១.ឈ្មោះស៊ុំ តុលា ភេទប្រុស អាយុ២៥ឆ្នាំ ជនជាតិខ្មែរមុខរបរមិនពិតប្រាកដមានទីលំនៅផ្ទះប្លុកគីមស៊ឺងផ្លូវលេខ១៤៤ សង្កាត់ផ្សារកណ្តាលទី២ ខណ្ឌដូនពេញរាជធានីភ្នំពេញ។
២.ឈ្មោះមឿន កី ភេទប្រុស អាយុ២១ឆ្នាំ ជនជាតិខ្មែរមុខរបររត់ម៉ូតូរឺម៉កកង់បី មានទីលំនៅផ្ទះជួលភូមិសាមគ្គីសង្កាត់ឬស្សីកែវខណ្ឌឬស្សីកែវរាជធានីភ្នំពេញ។
៣.ឈ្មោះនង ម៉ានិត ភេទប្រុស អាយុ២៩ឆ្នាំ ជនជាតិខ្មែរមុខរបរមិនពិតប្រាកដ មានទីលំនៅផ្ទះលេខ៥១អឺ៣ ផ្លូវលេខ១៥សង្កាត់ផ្សារចាស់ខណ្ឌដូនពេញរាជធានីភ្នំពេញ។
៤.ឈ្មោះផាត់ វិច្ឆ័យ ភេទប្រុស អាយុ២០ឆ្នាំ ជនជាតិខ្មែរមុខរបរមិនពិតប្រាកដមានទីលំនៅមិនពិតប្រាកដ។
វត្ថុតាងចាប់យកបាន ម៉ូតូរឺម៉កកង់បីមួយគ្រឿងម៉ាកC100កូរ៉េពណ៌ក្រហមគ្មានស្លាកលេខ(ជារបស់ជនសង្ស័យឈ្មោះមឿន កី)។
ជនរងគ្រោះឈ្មោះ PETER JOHNBOLT ភេទប្រុស អាយុ៥៣ឆ្នាំ ជនជាតិអង់គ្លេស មុខរបរទេសចរណ៍ ស្នាក់នៅសណ្ឋាគារស៊ីវើរថោន ផ្លូវលេខ៦៣ សង្កាត់បឹងកេងកងទី១ ខណ្ឌចំការមន រាជធានីភ្នំពេញ ។
សំភារះបាត់បង់មាន លុយចំនួន២៧០ដុល្លារ.ចិញ្ជៀនមាសមួយវង្យ(តំលៃ១២០០ដុល្លារ).នាឡិកាដៃមួយម៉ាកCasioនិងវែនតាការពារកំដៅមួយ។
ក្រោយឃាត់ខ្លួនជនសង្ស័យទាំង៤នាក់ខាងលើ សមត្ថកិច្ចធ្វើតេសទឹកនោមរកឃើញថា ធ្លាប់ប្រើប្រាស់គ្រឿងញៀន ។
បច្ចុប្បន្នកំពុងជនសង្ស័យកំពុងឃាត់ខ្លួនបណ្ដោះអាសន្ននៅអធិការដ្ឋាននគរបាលខណ្ឌដូនពេញដើម្បីកសាងសំណុំរឿងតាមនីតិវិធី ៕ស តារា
