សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ យុវជន២នាក់ ត្រូវកម្លាំងនគរបាលប៉ុស្តិ៍រដ្ឋបាលភ្នំពេញថ្មី ខណ្ឌសែនសុខឃាត់ខ្លួន បន្ទាប់ពីសមត្ថកិច្ចជិះល្បាតក្នុងមូលដ្ឋាន ប្រទះឃើញនិងមានការសង្ស័យក៏ឆែកឆេររកឃើញមានដាវសាមូរ៉ៃកែច្នៃ១ដើម ។
ករណីឃាត់ខ្លួនយុវជនទាំង២នាក់នេះ បានធ្វើឡើងកាលពីវេលាម៉ោង១២រំលងអាធ្រាត្រឈានចូលថ្ងៃចន្ទ ៨កើត ខែភទ្របទ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី១៧ ខែកញ្ញា ឆ្នាំ២០១៨ នៅចំណុចតាមផ្លូវ១៩៨៦ ភូមិទំនប់ សង្កាត់ភ្នំពេញថ្មី ខណ្ឌសែនសុខ ។
មន្រ្តីនគរបាលប៉ុស្តិ៍រដ្ឋបាលភ្នំពេញថ្មី បានឲ្យដឹងថា យុវជន២នាក់ដែលសមត្ថកិច្ចឃាត់ខ្លួននោះ ជាប់ពាក់ព័ន្ធករណីកាន់កាប់អាវុធគ្មានច្បាប់អនុញាត្តិ (ដាវកែច្នៃ) ដោយទី១-ឈ្មោះ លី សីហា ភេទប្រុស អាយុ ១៦ឆ្នាំ មុខរបរមិនពិតប្រាកដ ស្នាក់នៅផ្ទះសង់ថ្មី ផ្លូវបេតុង ភូមិត្រពាំងពលា សង្កាត់គោករកា ខណ្ឌព្រែកព្នៅ (មានសារធាតុញៀន ) ,និងទី២-ឈ្មោះ ពុំ វ៉ាន់ដា ភេទប្រុស អាយុ ២៨ឆ្នាំ មុខរបរមិនពិតប្រាកដ ស្នាក់នៅផ្ទះសង់ថ្មី ផ្លូវបេតុង ភូមិទំនប់ សង្កាត់ភ្នំពញថ្មី ខណ្ឌសែនសុខ (មានសារធាតុញៀន ) ។ សម្ភារះដកហូត ៖ ដាវសាមូរ៉ៃកែច្នៃ០១ដើម , ក្រាមពណ៍សថ្លាចំនួន ០១កូនថង់តូច , និងម៉ូតូចំនួន០១គ្រឿង ម៉ាកសេ១១០ ពណ៌ខ្មៅ ផលិតឆ្នាំ២០១២ ពាក់ស្លាកលេខ ពោធិសាត់ 1E-3088 ។
មន្រ្តីដដែលបន្តទៀតថា មុនពេលកើតហេតុ កម្លាំងល្បាតប៉ុស្តិ៍ភ្នំពេញថ្មី បានធ្វើការល្បាតក្នុងភូមិសាស្ត្រ ដល់ចំណុចខាងលើ ឃើញជនសង្ស័យ២នាក់ កំពុងជិះម៉ូតូឌុបគ្នាតាមផ្លូវ ដោយមានការសង្ស័យកម្លាំងក៏ហៅឲ្យឈប់រួចធ្វើការត្រួតពិនិត្យលើដងខ្លួន រកឃើញវត្ថុតាងខាងលើ នៅជាជាប់ខ្លួនជនសង្ស័យ រួចកម្លាំងសមត្ថកិច្ចបាននាំខ្លួនជនសង្ស័យរួមវត្ថុតាង យកមកធ្វើការសាកសួរ នៅអធិការដ្ឋាននគរបាលខណ្ឌសែនសុខ ។
បច្ចុប្បន្ន ជនសង្ស័យទាំង២នាក់ កំពុងឃាត់ខ្លួនបណ្ដោះអាសន្ននៅអធិការដ្ឋាននគរបាលខណ្ឌសែនសុខ ដើម្បីចាត់វិធានការតាមច្បាប់ ៕ស តារា
