សារព័ត៌មាន នគរវត្ត តែងតែនាំមុខគេជានិច្ច
ខេត្តពោធិ៍សាត់៖ កម្លាំងនគរបាលជំនាញព្រហ្មទណ្ឌនៃអធិការដ្ឋាននគរបាលក្រុងពោធិ៍សាត់ ប៉ុស្តិ៍រដ្ឋបាលផ្ទះព្រៃ សហការគ្នាចុះស្រាវជ្រាវ និងឃាត់ខ្លួនជនសង្ស័យចោរលួចយ៉ាងសកម្មម្នាក់ ដើម្បីបំពេញសំណុំបែបបទបញ្ជូនទៅការិយាល័យជំនាញបន្តនីតិវិធី។
ប្រតិបត្តិការខាងលើធ្វើឡើងនៅវេលាម៉ោង៥ និង៣០នាទីល្ងាច ថ្ងៃទី២៥ ខែកញ្ញា ឆ្នាំ២០១៨ ស្ថិតក្នុងភូមិចំការចេកខាងជើង សង្កាត់ផ្ទះព្រៃ ក្រុង.ខេត្តពោធិ៍សាត់។
នគរបាលក្រុងពោធិ៍សាត់ប្រាប់ថា ជនសង្ស័យជាមុខសញ្ញាត្រូវបានបង្រ្កាបឈ្មោះ រ៉េត ប៊ុនរឿន ភេទប្រុស អាយុ ៣១ឆ្នាំ ជនជាតិខ្មែរ បច្ចុប្បន្ន រស់នៅភូមិ.សង្កាត់កើតហេតុខាងលើ។
នគរបាលខាងលើបន្តថា ការដែលកម្លាំងនគរបាលជំនាញយើងសហការឃាត់ខ្លួនជនសង្ស័យជាមុខសញ្ញា ជននេះជាមុខសញ្ញាលួចយ៉ាងសកម្មម្នាក់នៅក្រុងពោធិ៍សាត់ ជាក់ស្ដែងជនសង្ស័យបានធ្វើសកម្មភាពលួចកង់ និងម៉ូតូ កាលពីថ្ងៃទី២៤.២៥ ខែកញ្ញា ឆ្នាំ២០១៨ កន្លងមកថ្មីៗនេះ ជនសង្ស័យនាំយកទៅបន្តនីតិវិធី នៅអធិការដ្ឋាននគរបាលក្រុងពោធិ៍សាត់ ដើម្បីបំពេញសំណុំឯកសារពាក់ព័ន្ធបញ្ជូនបន្ត ទៅការិយាល័យជំនាញព្រហ្មទណ្ឌនៃស្នងការនគរបាលចាត់ការបន្ត។
បើទោសជានគរបាលក្រុងពោធិ៍សាត់លើកឡើងបែបនេះក្ដី ពាក់ព័ន្ធទៅនឹងករណីជនសង្ស័យជាមុខសញ្ញាលួចយ៉ាងសកម្ម ប៉ុន្តែអ្នកសារព័ត៌មានមជ្ឈមណ្ឌលព័ត៌មាន នគរវត្ត ពុំអាចស្វែងរកប្រភពណាមួយពីជនសង្ស័យខាងលើបាននោះឡើង៕ ប៉ឹម ពិន
