សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ រថយន្តម៉ាកហ៊ីយ៉ាន់ដាយមួយគ្រឿង ប្រភេទរថយន្តកុងតឺន័រ បានបើកលឿនព្យាយាមជែង រថយន្តម៉ាកហ៊ីណូមួយគ្រឿងទៀត តែមិនទាន់ផុតផង ស្រាប់តែមានរថយន្តមួយគ្រឿងទៀត ដែលបើកបញ្ច្រាសទិស ក៏គេចមកបុកគូទរថយន្តហ៊ីណូបណ្តាលឲ្យគាបជាប់តៃកុងក្នុងកាប៊ិនរងរបួសបាក់ជើង ។
ហេតុការណ៍នេះ បានកើតឡើងកាលពីវេលាម៉ោង១រសៀល ថ្ងៃទី៤ ខែតុលា ឆ្នាំ២០១៨ នៅចំណុចមុខក្រុមហ៊ុមលក់អេស្កាវទ័រ តាមបណ្តោយផ្លូវទំនប់កប់ស្រូវ សង្កាត់ត្រពាំងក្រសាំងខណ្ឌពោធិ៍សែនជ័យ រាជធានីភ្នំពេញ ។
តាមសាក្សីនៅកន្លែងកើតហេតុបានឲ្យដឹងថា មុនពេលកើតហេតុ គេបានឃើញរថយន្តចំនួន២គ្រឿង បើកបរស្របទិសគ្នាដោយមួយគ្រឿងម៉ាក ហ៊ីណូ ពណ៌ខៀវ ពាក់ស្លាកលេខ ភ្នំពេញ 3A 3954 បើមកខាងមុខក្នុងទិសដៅពីជើងទៅត្បូង ចំណែករថយន្តមួយគ្រឿងទៀត ម៉ាកហ៊ីយ៉ាន់ដាយ ពណ៌ទឹកប្រាក់ គ្មានស្លាកលេខ បើកបរក្នុងល្បឿនលឿន មកពីក្រោយហើយព្យាយាមជែងរថយន្តខាងមុខ តែមិនទាន់ផុតផង ស្រាប់តែរថយន្តមួយគ្រឿងទៀត ដែលបើកបញ្ច្រាសទិស ក៏គេចមកបុកគូទរថយន្តហ៊ីណូបណ្តាលឲ្យគាបជាប់តៃកុងរថយន្តហ៊ីយ៉ាន់ដាយ ក្នុងកាប៊ិនរងរបួសបាក់ជើង ។
ភ្លាមនោះត្រូវបានប្រជាពលរដ្ឋ ដែលនៅក្បែរ រួមទាំងអ្នកដំណើរជួយគាស់យកចេញមកក្រៅបញ្ជូនទៅសង្គ្រោះនៅមន្ទីរពេទ្យភ្លាមៗ ។
ក្រោយពេលកើតហេតុ សមត្ថកិច្ចមូលដ្ឋានបានចុះទៅដល់ចំណុចកើតហេតុ និងវាស់វែងយកទៅរក្សាទុក នៅអធិការដ្ឋាននគរបាលខណ្ឌពោធិ៍សែនជ័យរង់ចាំដោះស្រាយតាមច្បាប់ ៕ សុខាសែនជ័យ
